Senator Lindsi Qrem bildirib ki, bu addım Rusiyaya daha ciddi zərbə vurmaq məqsədi daşıyır...
Poliqon xəbər verir ki, ABŞ senatoru Lindsi Qrem "All Israel News" nəşrinə müsahibəsində Prezident Donald Trampın Ukraynaya Rusiyaya qarşı uzaqmənzilli raketlərdən istifadə üçün mövcud məhdudiyyətləri aradan qaldırmağa hazırlaşdığını açıqlayıb. Senatorun sözlərinə görə, bu addım Ukrayna Silahlı Qüvvələrinin müdafiədən hücuma keçməsi və Rusiya ordusuna daha ağır zərbələr endirməsi üçün vacibdir.
Qrem vurğulayıb ki, yaxın vaxtlarda Alyaskada keçirilən görüş zamanı Rusiya Prezidenti Vladimir Putin müəyyən güzəştlərə getməyə razılıq verib. O, bu güzəştlərin “əhəmiyyətli, lakin hələ açıqlanmayan” məqamlar olduğunu qeyd edib. Senatorun sözlərinə görə, Moskva yalnız təzyiq qarşısında güzəştə getməyə hazırdır və buna görə də Vaşinqtonun siyasəti daha sərt olmalıdır.
Senator əlavə edib ki, gələn ay ABŞ Konqresinə Rusiyanın “terrorizmə sponsorluq edən dövlət” kimi tanınması barədə qanun layihəsi təqdim edəcək. Qremin sözlərinə görə, bu təşəbbüs Rusiyaya qarşı həm siyasi, həm də iqtisadi təzyiqləri artıracaq və Ukraynaya daha geniş beynəlxalq dəstək qazandıracaq.
Poliqon.info
