Bakı, 27 avqust, AZƏRTAC
Mövsümün sonuna on mərhələ qalmış “Ferrari” ilk dördlükdə qələbəsi olmayan yeganə komandadır.
AZƏRTAC xəbər verir ki, keçmiş pilot və “F1 TV” eksperti Colion Palmer Şarl Lekler və Lyuis Hemiltonun birinci yer uğrunda mübarizə aparmaq şansı yüksək olan trasları açıqlayıb.
“Kanada mərhələsindən sonra demişdim ki, “Ferrari” bu il yarışı qazanacaq. Bu fikrimdə qalmaqdayam, çünki qarşıdakı bəzi traslar onların maşınına uyğundur.
Ən azı Macarıstan trasında sürətləri vardı, amma yarış ərzində yol hündürlüyünün həddən artıq aqressiv tənzimlənməsi səbəbindən finişə çətinliklə çatdılar. Bununla komanda sürət axtarışında aqressiv yanaşma nümayiş etdirdi. Nəticədə Şarl Lekler nəzəri cəhətdən maşına uyğun sayılmayan trasda xal qazandı.
Düşünmürəm ki, Zandfortda “Ferrari” sürətli olsun. Mən Monçanı və Sinqapuru gözləyərdim, çünki bu traslarda aşağı sürətli döngələr “Ferrari”yə qələbə şansı verəcək”, - deyə Palmer qeyd edib.
