Azərbaycan Respublikasının Prezidenti İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində bildirib ki, Azərbaycanın əsas hissəsini Naxçıvan Muxtar Respublikası birləşdirən yolun tikintisini amerikalı investorlar həyata keçirə bilər.
İqtisadçı ekspert Natiq Cəfərli Redaktor.az-a mövzu ilə bağlı danışarkən bildirdi ki, Azərbaycan Amerika ilə başqa sahələrdə investisiya layihələri həyata keçirəcək.
"Ermənistan ərazisində amerikalı investorların Ermənistanla birgə layihələrinin həyata keçirilməsinin birbaşa Azərbaycan iqtisadiyyatına təsiri yoxdur. Prezident İlham Əliyevin son səfərindən sonra Amerika ilə Azərbaycan arasında investisiya layihələrinin sürətlənməsinin şahidi olduq".
Onun fikrincə, Zəngəzur yolunun açılması qlobal olaraq Amerika şirkətlərinin daha çox Cənubi Qafqazda, o cümlədən Azərbaycanda təmsil olunmasına yol açacaq:
"Amma sırf Zəngəzur dəhlizinin tikintisi ilə bağlı Trampın təklif etdiyi layihə Ermənistanla Amerika arasında olan müqavilədir və burada Ermənistanla Amerikanın məsələləri həll etməsi nəzərdə tutulur. Azərbaycan çox ağıllı gediş edərək bu məsələdə yarana biləcək, məsələn, konfliktlərin, fikir ayrılıqlarının qonşu ölkələrlə İranla, Rusiya ilə, Amerika ilə Ermənistanın özü tərəfindən həll olunmasını önə çəkir və bu, doğru yanaşmadır".
Aytəkin TOFİQQIZI
