Trampın səhhəti ilə bağlı narahatlıqlar artırır
Ajans.az Moskovskiy Komsomolets-ə istinadən xəbər verir ki,ötən həftə də Trampın sağ qolunun qalın tonal krem ilə örtülməsi diqqət çəkmişdi. Ağ Evin mətbuat katibi Caroline Levitt bildirib ki, prezidentin qolundakı qançırlar “əl sıxışdırmaq və aspirin qəbul etməkdən yaranan qıcıqlanma ilə uyğundur”. Daily Mail-in əldə etdiyi açıqlamalarda Trampın həkimi Sean Barabella izah edib ki, qançırlar standart ürək xəstəliklərinin qarşısının alınması rejiminin bir hissəsi olaraq qəbul edilən əllərin sıxılması və aspirin qəbulu nəticəsində yaranan kiçik yumşaq toxuma qıcıqlanmasıdır. Keçmiş həkim Ronnie Jackson isə Trampın “bu ölkənin indiyə qədər gördüyü ən sağlam prezident” olduğunu bildirib və onun fiziki və əqli baxımdan sağlam olduğunu vurğulayıb. Prezidentin qolundakı qançırlar və şişmiş topuqları Trampın ikinci müddətinə başladığı dövrdən bəri ictimaiyyətdə maraq və narahatlıq mövzusu olub. Keçən ay Ağ Ev Trampın aşağı ayaqlarında yüngül şişkinlik olduğunu və bunun üçün diaqnostik damar testi də daxil olmaqla hərtərəfli fiziki müayinədən keçdiyini açıqlamışdı. Levitt qeyd edib ki, bu vəziyyət 70 yaşdan yuxarı insanlar arasında yaygındır və dərin damar trombozu və ya arterial zədələnməyə dair heç bir dəlil yoxdur. Prezident yanvar ayında vəzifəyə başladıqdan sonra demək olar ki, hər ay qolunda oxşar qançırlarla ictimaiyyət qarşısına çıxıb və bəzən göyərmələri ört-basdır etmək üçün makiyajdan istifadə edib. Tramp aprel ayında Walter Reed Milli Hərbi Tibb Mərkəzində aparılan geniş tibbi müayinə zamanı fiziki və koqnitiv baxımdan yaxşı nəticələr göstərdiyini açıqlayıb. Onun yeni həkimi Sean Barabella tərəfindən aparılan müayinə isə təxminən beş saat davam edib. Prezidentin səhhəti ilə bağlı yaranan narahatlıqlar və qançırların görünməsi ictimaiyyət və media tərəfindən diqqətlə izlənilməyə davam edir. 
