Məşhur yuxu gigiyenası qaydaları hər kəs üçün eyni dərəcədə faydalı olmur. AzPost xəbər verir ki, somnoloqların fikrincə, yuxusuzluqdan əziyyət çəkən insanlar üçün bu metodların bir qismi əksinə, vəziyyəti daha da çətinləşdirə bilər.
Mütəxəssislərin sözlərinə görə, sağlam yuxu ürək-damar və immun sistemini möhkəmləndirir, beyin fəaliyyətini və emosional sabitliyi artırır. Buna görə də insanlar yuxu gigiyenasına xüsusi diqqət yetirirlər. Lakin müəyyən vərdişlər – məsələn, tez yatmaq və ya səhərlər uzun müddət yataqda qalmaq – yuxusuzluğu gücləndirə bilər.
Araşdırmalara görə, yuxuya gedə bilmədiyi halda yataqda çox vaxt keçirmək, şüurda yataqla istirahət yox, narahatlıq və məyusluq arasında assosiasiya yaradır. Bu halda tövsiyə edilən üsul, daha gec yatmaq və hər gün eyni saatda oyanmaqdır.
Somnoloqlar bildirirlər ki, yuxudan əvvəl ekranlardan imtina qaydası da bəzən həddindən artıq sərtləşdirilir. Çünki yuxusuz insanlar telefon və ya planşetdən daha çox “vaxt öldürmək” üçün istifadə edirlər. Bu zaman qaranlıqda uzanmaq, diqqəti yayındıracaq heç bir faktor olmadığından, insanı daha çox narahatlığa sürükləyə bilər. Ona görə də cihazlardan məqsədli istifadə – sakitləşdirici kontent seçmək, “gecə rejimi” aktivləşdirmək – rahatlaşmağa kömək edə bilər.
Kofeinlə bağlı da vəziyyət birmənalı deyil. O, yuxu gətirən adenozinin təsirini azaldır və orqanizmdə müxtəlif insanlarda fərqli cür parçalanır. Bəzi insanlar səhər kofe qəbul etməklə günə daha tez adaptasiya olur. Bu səbəbdən, kofeindən tamamilə imtina etmək əvəzinə, onu günün ikinci yarısında məhdudlaşdırmaq tövsiyə olunur.
Mütəxəssislər vurğulayırlar ki, əsas məqsəd hər kəsin öz bədən reaksiyasını öyrənməsi və fərdi yuxu ritmini düzgün qurmasıdır.
