Təxminən 16 min nəfərin qidalanma vərdişləri araşdırılıb və maraqlı nəticələr əldə olunub.
AZƏRTAC www.sciencealert.com saytına istinadla xəbər verir ki, Kanadanın McMaster Universitetinin alimlərinin apardıqları araşdırmaya görə, heyvan mənşəli zülalın qəbulu (ət, toyuq, balıq, yumurta və s.) ölüm riskini artırmır. Əksinə, daha çox heyvan zülalı qəbul edən insanların xərçəngdən ölüm riski bir qədər aşağı olur.
Nəticələrə əsasən, heyvan və ya bitki zülalı yemək ümumi ölüm riskinə də təsir etmir. Heyvan zülalı xərçəngdən qoruyucu təsir də göstərə bilər. Bitki zülalının təsiri isə bu sahədə zəifdir.
Araşdırmaya rəhbərlik edən professor Stuart Phillips bildirib ki, zülalın sağlamlıqla əlaqəsi ətrafında çox qarışıqlıq var. Bu iş sübuta əsaslanan daha aydın nəticələr ortaya qoyur.
Alimlər dəqiqlik üçün qabaqcıl statistik metodlardan istifadə ediblər və nəticələrin etibarlı olduğunu vurğulayıblar. Bu işin maliyyələşdirilməsi Amerika Birləşmiş Ştatlarının Milli Maldarların Mal əti Assosiasiyası tərəfindən həyata keçirilib. Lakin tədqiqatçılar təşkilatın nəticələrə qarışmadığını qeyd ediblər.
Eyni zamanda, vurğulanıb ki, həm heyvan, həm də bitki zülalları sağlam pəhrizin bir hissəsi ola bilər. Ət yemək isə müəyyən hallarda xərçəngə qarşı qoruyucu rol oynaya bilər.
