Cebheinfo portalından verilən məlumata görə, ain.az xəbər yayır.
Sentyabrın 1-dən etibarən Rusiyada qüvvəyə minəcək yeni qanun mobil telefon nömrələrinin başqalarına verilməsini ciddi şəkildə məhdudlaşdırır.
"Cebheinfo.az" xəbər verir ki, “Parlamentskaya Qazeta”nın xəbərinə görə, bu tənzimləmə yalnız pul cəzası deyil, həm də həbs cəzası nəzərdə tutur.
Əgər kimsə kommersiya məqsədilə üçüncü şəxslərə SİM kart və ya hesab giriş məlumatlarını verərsə, 700 min rubladək cərimə və ya üç ilə qədər həbs cəzası ala bilər.
Daha az miqyaslı pozuntular üçün isə 300 min rubladək cərimə və ya iki ilədək həbs cəzası tətbiq oluna bilər.
Millət vəkili Anton Nemkin istisnanın yalnız ailə üzvləri üçün keçərli olduğunu vurğulayıb. Yəni həyat yoldaşı, valideyn, övlad, bacı-qardaş və nəvələrlə paylaşım sərbəstdir, lakin dostlara və ya iş yoldaşlarına xətt vermək artıq qadağandır.
Nemkinə görə bu sərtləşmə telefon fırıldaqçılarının onlarla xətti anonim şəkildə istifadə etməsinin qarşısını alaraq rəqəmsal təhlükəsizliyi artıracaq.
Əslində yay boyunca müzakirə olunan tədbirlər bununla məhdudlaşmayıb. Rabitə Nazirliyi xarici SİM kartlardan gələn zənglərin avtomatik bloklanmasını da təklif etmişdi.
Beləliklə, xaricdən zəng qəbul etmək istəyən abunəçilər operatorlarına xüsusi müraciət etməli olacaqlar.
Bundan əlavə, operatorların bütün beynəlxalq zəngləri işarələməsi, “şübhəli” nömrələri bağlayıb xüsusi qeydiyyat sisteminə yönləndirməsi də planlaşdırılır. Hətta bu danışıq qeydlərinin tələb olunması da gündəmdədir.
Yeni qanunlar bir tərəfdən vətəndaşları fırıldaqçılardan qorumağı hədəfləyir, digər tərəfdən isə gündəlik ünsiyyəti ciddi şəkildə təsirləndirə bilər.
Xüsusilə tez-tez səyahət edənlər və ya iş üçün xarici nömrələrlə çalışanlar üçün prosesin necə işləyəcəyi hələlik qeyri-müəyyəndir.
Nigar Hacılı
"Cebheinfo.az"
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
