"Qarabağ"ın direktoru Əmrah Çəlikəl Çempionlar Liqasının pley-off mərhələsinin "Ferentsvaroş"la görüşündən sonra jurnalistlərə müsahibə verib.
Sportinfo.az xəbər verir ki, Ağdam klubunun rəsmisi əldə edilən uğurla bağlı danışıb.
- "Ferentsvaroş"a qarşı çox gözəl iki oyun izlədik. Ümumi nəticədə qalib gələn tərəf olduq və Çempionlar Liqasına ikinci dəfə oynamaq haqqı qazandıq. Bunu qazanmağımız hamımızı çox sevindirir.
- Tahir Gözəlin burada olmaması nə ilə əlaqədardır?
- Tahir bəy, elə bilin ki, burada idi. Hər dəqiqə telefonla danışırdıq. Çox vacib işgüzar görüşü var idi deyə, xaricə yollanmışdı. Daim danışırdıq.
- Azarkeşlik etdiyiniz klub var ki, Çempionlar Liqasının püşkatmasında onlarla düşməyinizi istəyərdin?
- "Qarabağ"dır, biz də oradayıq.
- Əsas komanda ÇL-ə düşdüyü üçün U-19 komandanız da UEFA Gənclər Liqasında iştirak edəcək. Bununla bağlı hazırlıqlar var?
- Bizim hazırlıq planımız hazırdır. Bu oyunun nəticəsini gözləyirik.
- Çempionlar Liqasının əsas mərhələsində Bakı Olimpiya Stadionunda oynyacaqsız, yoxsa Tofiq Bəhramov stadionunda?
- Hələ ki, bəlli deyil. Amma çox güman ki, Çempionlar Liqasının oyunlarını Tofiq Bəhrəmov stadionunda keçirəcəyik.
- Komandanın heyətinin gücləndirilməsi istiqamətində işlər davam etdirilir?
- O həmişə var. İndi də bu iş üzrə hazırlıqlar gedir. Futbolçu axtarışları davam edir.
