“Rusiyanın İranla əsl mənada müttəfiq olacağına inanmaq isə yanlışdır. Cünki...”
“Ayının min oynu var bir armudun üstündə” - deyiblər. ABŞ İsrail vasitəsi ilə İrana təzyiq etmək istədi - bacarmadı. İran onun qarşısına dünyanın ən güclü ballistik raketini çıxartdı. Əvvəlcədən Qətərdə olan ABŞ bazasını vuracağını dedi, hətta haçan vuracağını da dedi. Qətərdəki və İsraildəki bütün hava hücumundan müdafiə sistemləri İranın ballistik raketini vura bilmədi. Bununla da ABŞ-ın İsrailin əliylə həyata keçirtdiyi İsrail-İran müharibəsinə prezident Donlad Tramp son qoydu”.
Bu fikirləri hafta.az əməkdaşının “ABŞ və İsrail yenidən İrana hücuma keçsə, Rusiya yenə İrana dəstək verməyəcək?” sualını cavablandırarkən siyasi analitik Tahir Cəfərli ifadə edib.
“Trampın sonrakı addımlarını başa düşmək üçün ABŞ-İran münasibətlərinə də ənənəvi ingilis siyasəti mövqeyindən yanaşmalıyıq. Onun postulatlarından biri də budur: Əgər düşmən səndən güclüdürsə, onu özünə dost et! İndi ABŞ-İran münasibətlərində bu proses aktuallaşır. Odur ki, ABŞ artıq İsraili İrana qarşı qaldırmayacaq”, - deyə davamında həmsöhbətimiz diqqətə çatdırıb.
Siyasi analitik hesab edir ki, Rusiya heç vaxt İranla əsil mənada siyasi muttəfiq olmayıb.
“İndi keçək Rusiyanın İranla münasibətlərinə... Yenə yuxarıda dediyim ayının armud oyunudur... ABŞ, Rusiya və Türkiyənin bir oyunu var: Avropa İttifaqını dağıtmaq və həmin ölkələri 80-cı illərin səviyyəsinə gətirmək. Bu niyyəti həyata keçirmək üçün Ukrayna müharibəsi Rusiyaya bəsdir... Rusiyanın İranla əsl mənada müttəfiq olacağına inanmaq isə yanlışdır. Cünki İranın nəzarətində olan torpaqları ruslar 19-cu əsrdən başlayaraq zəbt ediblər və İran bir dövlət kimi gücləndikcə həmin torpaqların qaytarılmasını istəyəcək...
Digər tərəfdən, öncə dediyim kimi, Qətərə atılan İran ballistik raketi dünyada tarazlığı təmin etdi. Bu səbəbdən ABŞ-ın İsraillə birgə İrana növbəti hücumu olmayacağından Rusiyanın İrana köməyinə də ehtiyac qalmayacaq”, - deyə Tahir Cəfərli vurğulayıb.
