BAKI, 28 avqust. TELEQRAF
Almaniyanın "Rheinmetall" müdafiə konserninin baş direktoru Armin Papperger Ukrayna Prezidenti Volodimir Zelenskinin Kiyevə 2,5 milyon artilleriya mərmisinin verilməsini tələb etdiyini açıqlayıb.
Teleqraf xəbər verir ki, o, bu barədə "Sky News"a verdiyi müsahibəsində bildirib.
Papperger hazırda Qərb ölkələrinin ildə təxminən 2 milyon artilleriya mərmisi istehsal etdiyini, lakin bunun Ukraynanın ehtiyaclarını ödəmək üçün kifayət etmədiyini bildirib.
Pappergerin sözlərinə görə, Zelenski ona atəşkəs baş tutsa, 2,5 milyon, münaqişə davam edərsə isə 4,5 milyon artilleriya mərmisinin lazım olduğunu deyib. Papperger bu mərmilərin 50 faizinin "Rheinmetall" zavodlarında istehsal ediləcəyini də vurğulayıb.
Rheinmetall baş direktoru həmçinin, Avropa ölkələrinin mövcud sursat ehtiyatlarını tamamilə yeniləmək üçün ən azı 10 il zaman tələb edəcəyini qeyd edib.
