Serbiya millisinin və Türkiyənin “Sivasspor” klubunun sol vingeri Velko Simiç bundan sonra “Sabah”ın uğurları üçün çalışacaq.
Arena.az bu barədə paytaxt klubunun mətbuat xidmətinə istinadən xəbər verir.
Bildirilir ki, serbiyalı hücumameyilli yarımmüdafiəçinin keçidi ilə bağlı Türkiyənin “Sivasspor” klubu ilə razılıq əldə edilib. Anlaşmaya əsasən, futbolçu 1 il icarə əsasında Azərbaycan komandasının uğurları üçün çalışacaq.
Simiç karyerası ərzində “Sivasspor”la yanaşı, Serbiyanın “Srvena Zvezda” (2012-2013, 2018-2021), “Zemun” (2018), “Voyvodina” (2021-2023), İsveçrənin “Bazel” (2013-2017), “Şaffhauzen” (2016), “Kyasso” (2016-2017), “Vintertur” (2017), Sloveniyanın “Domjale” (2014-2015) və Kiprin “Omoniya” (2023-2025) klublarında çıxış edib.
Velko Simiç Serbiyanın müxtəlif yaş qruplarından ibarət yığmalarının və əsas millinin üzvü olub. O, “Sabah”da 21 nömrəli formada çıxış edəcək.
Xatırladaq ki, “Sabah” daha öncə Akim Zedadka, Stiv Solvet və Zinədin Uld Xaledi də transfer etmişdi. Rüstəm Samiqullin, Fəxri Məmmədli, Rauf Rüstəmli və Camal Cəfərov isə icarədən qayıdıblar.
Şakir Seyidov, Con İrasabal, Namiq Ələsgərov, Vensan Till, Sofian Çakla, Abdulla Rzayev, Yusif İmanov, Rauf Rüstəmli, Tuncay Yusifli və Xəlil Mürsəlli komandanı tərk ediblər. Rəhman Daşdəmirov, Stas Pokatilov və Anatoli Nuriyevlə də yeni müqavilə imzalanıb.
