“Marvel Studios”un superqəhrəman filmi “Eternals”ın (“Əbədi”) rejissoru, ikiqat “Oskar” laureatı Xloya Çjao (Chloé Zhao) yüksək büdcəli layihədə işləməyin əslində təhlükəli ola biləcəyini bildirib.
Rejissor yeni filmi Hamnetin təqdimatı ərəfəsində “Vanity Fair”ə açıqlamasında ““Eternals” məni Hamnetə hazırladı, çünki o da bir dünya qurmaq filmidir. Ondan əvvəl yalnız real həyatda baş verən hekayələr çəkmişdim. Orada nəyin mümkün, nəyin real olmadığını gördüm”, – deyə qeyd edib.
Çjao sözlərinə belə davam edib: “Eternalsın demək olar ki, limitsiz büdcəsi və resursları vardı. Heç bir məhdudiyyət yox idi və bu, əslində son dərəcə təhlükəlidir”.
Film pandemiyanın təsir etdiyi 2021-ci ilin çətin kino bazarında bütün dünyada 402 milyon dollar gəlir gətirmişdi. Buna baxmayaraq, “Marvel” pərəstişkarlarının əksəriyyəti “Eternals”ı Kinematoqrafik Kainatın ən zəif işlərindən biri hesab edir.
Filmdə Ancelina Coli (Angelina Jolie), Salma Hayek, Cemma Çan (Gemma Chan), Riçard Maden (Richard Madden), Kumail Nanciani (Kumail Nanjiani), Brayan Tayri Henri (Brian Tyree Henry) və Berri Koqan (Barry Keoghan) kimi ulduzlar rol almışdı.
Əslində “Eternals”ın noyabr 2020-də nümayişə çıxması planlaşdırılırdı, lakin pandemiya səbəbindən bir il gecikdirildi. Çjao daha əvvəl “Empire”ə açıqlamasında bu dəyişiklik səbəbilə filmin həm tənqidçilər, həm də “Marvel” izləyiciləri arasında parçalanmaya açıq hala gəldiyini vurğulamışdı: ““Eternals”, “Avengers: Endgame”dən dərhal sonra nümayiş olunacaqdı, hamının yaşamaq uğrunda mübarizə apardığı bir dövrdə yox. O film insanlığın və Tanrının var olma böhranından bəhs edir. Buna görə də bölünmənin qaçılmaz olacağını əvvəlcədən hiss etmişdik”.
Rejissor həmçinin bildirib ki, “Marvel” estetikası ilə özünün müstəqil kino üslubunun qarışması da filmin qütbləşməsinə yol açıb.
Çjaonun yeni filmi Hamnet Toronto Film Festivalında təqdim olunduqdan sonra noyabrın 27-də ABŞ-da nümayiş olunacaq. Film Azərbaycanda isə 2026-cı il fevralın 6 -da ekranlara çıxacaq.
