BAKI, 29 avqust. TELEQRAF
ABŞ Dövlət Departamenti Ukraynaya döyüş sursatlarının mümkün satışını təsdiqləyib.
Teleqraf xəbər verir ki, söhbət təxminən 825 milyon dollar dəyərində silahlardan gedir.
ABŞ Müdafiə Əməkdaşlığı Agentliyinin məlumatına görə, söhbət 3350 ədəd “Extended Range Attack Munition” (ERAM) raketindən və SAASM modulu ilə təchiz edilmiş eyni sayda GPS/INS sistemlərindən gedir. Qeyd olunur ki, Ukrayna hökuməti raketlərin alınması üçün sorğu göndərib.
Bu paketə həmçinin köməkçi avadanlıq, ehtiyat hissələri, təmir yardımı, proqram təminatı və bu kimi digər şeylər daxil olacaq. Raketlərin alınması üçün Ukrayna Danimarka, Niderland və Norveçdən maliyyə cəlb edəcək. Həmçinin ABŞ-nin beynəlxalq hərbi maliyyələşdirmə proqramının (FMF) vəsaitlərdən istifadə olunacağı bildirilir.
Əsas podratçılar “Zone 5 Technologies” və “CoAspire” şirkətləri olacaq. Qeyd olunur ki, raketlərin satışı ABŞ hökumətinin və ya podratçının əlavə nümayəndələrinin Ukraynaya ezam olunmasını tələb etməyəcək və ABŞ-nin müdafiə qabiliyyətinə mənfi təsir göstərməyəcək.
