Türkiyəli sənətçi Özcan Deniz bu dəfə səhnə performansları ilə deyil, ailə problemi ilə gündəmə gəlib.
Publika.az "Haber Global"a istinadla xəbər verir ki, ifaçının qardaşı Ercan Deniz aralarında yaranan maddi mübahisə zəminində məşhur sənətçinin Zekeriyaköydəki evinə silahla basqın edib.
Ercan Deniz silahla qardaşının evinə gedərək, "Məndən oğurladıqlarını mənə verməsən, həm səni, həm də özümü öldürəcəyəm", - deyə onu hədələyib.
Ailə münaqişəsinin kökündə maliyyə problemlərinin dayandığı iddia edilir. Özcan Deniz illər əvvəl Ercan Denizin götürdüyü kreditlərə zamin olub, lakin borclar ödənilməyəndə, sənətçi külli miqdarda zərərə düşüb və onun bank hesablarına həbs qoyulub.
