Vaşinqtonun müttəfiqi olan Avropa ölkələri Rusiya və ABŞ arasında Ukrayna münaqişəsinin həlli üzrə məsləhətləşmələrin təfərrüatlarını öyrənmək istəyirlər.
APA xəbər verir ki, bu barədə “The Atlantic” jurnalında dərc olunan məqalədə deyilir.
Məqalədə qeyd olunur ki, Avropa rəsmiləri Rusiya prezidenti Vladimir Putinin bağlı qapılar arxasında ABŞ tərəfinə nə vəd etdiyi, ABŞ rəsmilərinin Moskva ilə məsləhətləşmələrdən nə əldə etdikləri və bunun sülhə nail olmaq səylərinə necə təsir etdiyi ilə bağlı heç bir məlumatları yoxdur.
"Putinin ABŞ-ın xüsusi nümayəndəsi Stiven Uitkoffa və ya ABŞ prezidenti Donald Trampa nə dediyi və onların onu düzgün başa düşüb-düşmədiyi aydın deyil. Bu, hamımızın həll etməyə çalışdığımız bir sirdir", - Avropa rəsmilərindən biri jurnala açıqlaması zamanı deyib.
Jurnal onu da qeyd edir ki, Avropa ölkələri Rusiya tərəfinin Ukraynadakı böhranının həlli ilə bağlı qarşıya qoyduğu şərtləri də başa düşmək istəyirlər.
