Ukraynada 40 km-lik bufer zonası yaradılacaq?

AzVision.az xəbər verir ki, 5 avropalı diplomata istinad edən “Politico” nəşri belə məlumat yayıb.

“Bufer zonası Ukraynada müharibədən sonrakı nizamlanma və ya atəşkəs üçün hərbi və mülki məmurların müzakirə etdikləri bir neçə təklifdən biridir. Belə zonanın dərinliyinin nə qədərolması ilə bağlı ölkələr arasında konsensus yoxdur. Eyni zamanda, Ukraynanın ərazi güzəştlərindən söhbət getdiyindən Kiyevin buna razı olub-olmayacağı bəlli deyil”,- materialda deyilir.

Diplomatların sözlərinə görə, ABŞ hələlik bu müzakirələrdə iştirak etmir. Rəsmilərin kövrək sülhü təmin etmək üçün Ukrayna ərazisinin bir hissəsini bloklamağı nəzərdən keçirməsi NATO müttəfiqləri arasında yaranmış çarəsizliyin əlamətidir.

Pentaqonun keçmiş yüksək vəzifəli məmuru Cim Taunsend bildirib ki, ruslar avropalılardan qorxmurlar və əgər Avropadabir neçə britaniyalı və fransız müşahidəçinin rusların Ukraynaya müdaxiləsinə mane olacağını düşünürlərsə, səhv edirlər.

- Demarkasiyanın böyük tarixi əhəmiyyəti var. Avropalı diplomatlar onu texniki cəhətdən hələ də müharibə şəraitində olan Şimali və Cənubi Koreya arasındakı ciddi şəkildə qorunan sərhədlə yox, daha çox Almaniyanın Soyuq Müharibə zamanı bölünməsi ilə müqayisə edirlər”, - qəzet yazır.

Bufer zonasına nəzarət edəcək qoşunların sayına gəlincə, məmurlar 4 mindən 60 minə qədər sülhməramlı barədə müzakirə aparırlar. Lakin hələlik heç bir ölkə bununla bağlı rəsmi öhdəlik götürməyib. ABŞ prezidenti Donald Tramp daha əvvəl Amerika qoşunlarının Ukraynaya göndərilməsi ehtimalını rədd etmişdi.

Nəşr bildirir ki, NATO artıq alyansın şərq cinahını Rusiyanın gələcək hücumundan qorumaq üçün 300 min əsgərdən ibarət qüvvə hazırlamağa çalışır. İki diplomatın dediyinə görə, istənilən sülhməramlı qüvvə ikili rola malik olacaq: Ukrayna hərbçilərinə təlim keçəcək və demilitarizasiya zonası yaxınlığında patrul xidməti göstərəcək.

“Xarici hərbi kontingentin əsas hissəsini fransız və ingilis qoşunları təşkil edəcək və onlar digər müttəfiqləri hərbi dəstək verməyə çağırırlar. Eyni zamanda, Ukraynaya qoşun göndərmələrinin onları Rusiyanın hücumuna məruz qoyacağından ehtiyatlanan Polşa və Almaniya buna qarşı çıxıblar”,- avropalı diplomatlar vurğulayıblar.

Xatırladaq ki, bufer zonası bir ərazini digərindən ayırmaq üçün yaradılan ərazidir. Beynəlxalq münasibətlərdə münaqişə tərəfləri arasında gərginliyi azaltmaq və birbaşa toqquşma riskini minimuma endirmək üçün istifadə olunur.

Belə zonalar digər məqsədlər üçün, xüsusən də sanitariya-epidemioloji və ya ekoloji təhlükəsizliyin təmin edilməsi, mədəniyyət abidələrinin və tarixi irsin qorunması üçün də yaradıla bilər.

Sahil İsgəndərov
AzVision.az