Təyyarə mühərrik nasazlığı səbəbindən geri qayıtdı
Ajans.az xarici mediaya istinadən xəbər verir ki, U6-378 reysini həyata keçirən Airbus A321 tipli təyyarənin göyərtəsində 219 sərnişin olub. Təyyarə havaya qalxdıqdan cəmi bir dəqiqə sonra sol mühərrikdə texniki problem yaranıb və ekipaj təcili dönüş qərarı verib. “ChP Sochi” Telegram kanalının məlumatına əsasən, uçuş bir neçə dəfə gecikdikdən sonra saat 22:10-da həyata keçirilib. Təyyarə uğurla eniş etsə də, sərnişinlərdən bir neçəsinin səhhətində problem yaranıb, bir qadın xəstəxanaya yerləşdirilib. Şirkət sərnişinlərin yoluna davam etməsi üçün ehtiyat təyyarə ayırıb. Nəticədə, Domodedovoya uçuş səhər saat 07:14-də baş tutub. Qeyd edək ki, bundan əvvəl də oxşar hadisə yaşanmışdı – Londondan Pekinə uçan sərnişin təyyarəsi mühərrik nasazlığı səbəbindən Nijnevartovskda planlaşdırılmamış eniş etmiş, sərnişinlər orada təxminən 13 saat gözləməli olmuşdular.
