Əgər HƏMAS silahlarını təhvil verməkdən imtina edərsə, hökumət Qəzzanı ilhaq etməyə başlamalıdır.
Axar.az xəbər verir ki, bu sözləri İsrailin maliyyə naziri Bezalel Smotriç deyib.
Nazir Qüdsdə keçirdiyi mətbuat konfransında ilin sonunadək Qəzzada qələbə planını təqdim edib.
Smotriçin təklifinə görə, HƏMAS təslim olmaq, silahlarını təhvil vermək və 2023-cü ilin oktyabrındakı hücumdan sonra girov saxlanılanları azad etmək üçün ultimatum alacaq:
“Əgər HƏMAS bu tələblərə əməl etməsə, İsrail hər həftə Qəzzanın bir hissəsini ilhaq edəcək və dörd həftə ərzində bölgənin böyük hissəsi tam nəzarətə keçəcək”.
Nazir bildirib ki, əvvəlcə fələstinlilər Qəzzanın cənubuna köçürüləcək, sonra İsrail şimal və mərkəzi hissələrdə blokada tətbiq edib qalan HƏMAS döyüşçülərini məğlub edəcək və sonda əraziləri ilhaq edəcək.
Smotriç planın 3-4 ay ərzində həyata keçirilə biləcəyini vurğulayıb və Baş nazir Benyamin Netanyahudan planı dərhal qəbul etməsini tələb edib.
