Milli komandamızın baş məşqçisi Fernandu Santuş “Sumqayıt”ın qapıçısı Mehdi Cənnətovu milliyə çağırmayıb. Halbuki portuqaliyalı mütəxəssisin dəvət göndərdiyi digər qapıçılardan fərqli olaraq Cənnətov Azərbaycan Premyer Liqasının geridə qalan 2 turunda meydanda olub, üstəlik, hər iki matçda qapısını toxunulmaz saxlayıb. Bu halda ortaya sual çıxır: Santuş nə üçün hazırda ən yaxşı formada olan yerli qapıçıya dəvət göndərməyib?
Millimizin baş məşqçisi bugünkü mətbuat konfransında Mehdi Cənnətovun yığmaya dəvət almaması ilə bağlı qəribə fikir səsləndirib: “Mehdi milliyə dəvət ala bilməzdi. Çünki pasportla bağlı problemləri var”.
Cənnətov uzun illərdir ölkəmizdə çıxış edir və yerli futbolçu statusundadır, Azərbaycan pasportuna malikdir. Bu halda onun pasportla bağlı hansı problemi olar bilər? Yaxud problem var idisə, niyə vaxtında həll olunmayıb.
İdman.biz xəbər verir ki, “Sumqayıt”ın mətbuat xidmətinin rəhbəri Zaur Xudiyev bununla bağlı Futbolxeber.az saytının sualını cavablandırıb. Klub rəsmisi qeyd edib ki, bu, “Sumqayıt”la bağlı məsələ deyil: “Bu məsələ ilə maraqlandım. Qeyd olundu ki, bu məsələnin “Sumqayıt” klubuna heç bir aidiyyəti yoxdur. Suallarınızı AFFA-ya ünvanlaya bilərsiniz”.
Əslində, Fernandu Santuşun pasportla bağlı iddiası inandırıcı deyil. Çünki portuqaliyalı əvvəllər də yaxşı formada olduğu halda Mehdi Cənnətova dəvət göndərməyib. Yəni bu, ilk belə hal deyil.
İdman.biz
