Ajans.az CBS News-a istinadən xəbər verir ki,avqustun 26-da şirkətin Vaşinqton ştatındakı baş qərargahında keçirilən nümayişdən sonra iki işçinin işdən çıxarıldığı açıqlanmışdı. Avqustun 27-də isə daha iki nəfərin vəzifədən azad edildiyi təsdiqlənib. Şirkət sözçüsü bildirib ki, əməkdaşların hərəkətləri “Microsoft-un dəyərlərinə birbaşa zidd olub” və onların “şirkət siyasətini və davranış kodeksini ciddi şəkildə pozduqları” müəyyən edilib. Onun sözlərinə görə, etirazlar zamanı digər işçilərin təhlükəsizliyi də risk altında qalıb. Beləliklə, son iki gündə etiraz aksiyalarına görə işdən çıxarılanların sayı 4-ə çatıb. Avqustun 26-da Microsoft-un hazırkı və keçmiş işçiləri, yerli sakinlər və fəallar şirkətin İsrail ordusuna təqdim etdiyi xidmətlərə və texnoloji infrastrukturuna etiraz etmək üçün qərargah qarşısında aksiya keçiriblər. Etirazçılar “Microsoft-un fələstinlilərin soyqırımında rolu”nu vurğulayaraq, şirkətdən İsraillə əməkdaşlığı dayandırmağı və fələstinlilərə təzminat ödəməyi tələb ediblər. Etiraz zamanı Microsoft prezidenti Bred Smitin ofisinə daxil olan 7 nəfər polis tərəfindən saxlanılıb. Associated Press 2025-ci ilin əvvəlində yayımladığı araşdırmada iddia edib ki, Microsoft və OpenAI-ın süni intellekt modelləri Qəzza və Livanda bombardman hədəflərinin müəyyənləşdirilməsi üçün İsrail hərbi proqramında istifadə olunub. Bundan əlavə, The Guardian 6 avqust tarixində yazmışdı ki, İsrail ordusu fələstinlilərin telefon zənglərini izləmək məqsədilə “Microsoft Azure” bulud infrastrukturundan yararlanıb.

 

• Əməkdaş
• Microsoft
• Işdən Çıxarma
• İsrail