Azertag portalından alınan məlumata görə, ain.az xəbər verir.
London, 29 avqust, AZƏRTAC
Britaniya universitetlərini bitirən yerli məzunların gəlirləri ölkədəki əcnəbi məzunların qazancından geri qalır.
AZƏRTAC “Telegraph”a istinadla xəbər verir ki, Böyük Britaniya Təhsil Nazirliyinin məlumatına görə, bakalavriat təhsilini bitirdikdən beş il sonra 2022–2023-cü maliyyə ilində britaniyalı məzunların orta illik gəliri 31 min 400 funt təşkil edib. Bu göstərici ölkədə qalan Avropa İttifaqına daxil olmayan əcnəbi məzunların gəlirindən 9 min 800 funt, yəni 24 faiz azdır. Sonuncuların orta illik məvacibi 41 min 200 funt olub.
31 min 400 funt məvacib həmin dövrdə ölkə üzrə orta əməkhaqqı göstəricisindən bir qədər yüksək olsa da, əcnəbi məzunların qazancı onları ölkədəki bütün işçilərin ən yüksək 30 faizinə daxil edib.
Ali Təhsil Statistikasına əsasən, 2023–2024-cü tədris ilində biznes və menecment ixtisasları bakalavr pilləsində ən populyar sahə olub. Bu ixtisası seçənlərin 17 faizini britaniyalı tələbələr təşkil etdiyi halda, göstərici Avropa İttifaqından gələnlərdə 20 faiz, digər ölkələrdən gələnlərdə isə 28 faiz təşkil edib.
Aytən Abbaslı
AZƏRTAC-ın xüsusi müxbiri
London
Hadisənin gedişatını izləmək üçün ain.az saytında ən son yeniliklərə baxın.
