Bakı, 29 avqust, AZƏRTAC
Son 16 ildə ilk dəfə Bakı metrosunda interval azaldılıb, başqa sözlə qatar cütlərinin sayı 30-dan 32-yə yüksəldilərək interval 1 dəqiqə 52 saniyəyə qədər endirilib.
AZƏRTAC xəbər verir ki, bu barədə "Bakı Metropoliteni" QSC-nin sədrinin müşaviri Emil Əhmədov “Xocəsən" elektrik deposunda “Bakı Metropoliteni”nə gətirilmiş yeni nəsil qatarların yığılaraq komplektləşdirilməsi prosesi zamanı deyib.
Onun sözlərinə görə, hədəf mövcud texniki imkanları təftiş edərək, intervalı bir qədər də azaltmaqdır.
"İndi 2 qatar cütü sayında xətlərdə hərəkətin bir az da sıxlaşdırılması üzərində iş aparılır. Əsas hədəf yeni tədris mövsümündə ənənəvi sərnişin sıxlığının müsbət texniki həllidir. İntervalın azaldılması sərnişinin ən sıx olduğu saatlarda tətbiq olunacaq. Bununla bağlı müvafiq monitorinqlər yekunlaşmaq üzrədir və yeni mövsüm ərəfəsində elan ediləcək. İntervalın azaldılması üçün əlavə 4 qatarın stansiyadan keçməsi sayəsində 19 min əlavə sərnişin daşınması imkanı yaranacaq. Bu isə illik hesabla təxminən 5 milyon sərnişin artımına bərabər bir rəqəmdir", - deyə E.Əhmədov qeyd edib.
