FÜZULİ, 29 avqust. TELEQRAF
"Atam şəhid olanda mənim bir yaşım olub, çox təəssüf ki, onunla bağlı heç nəyi xatırlamıram".
Teleqraf-ın Qarabağ bürosunun xəbərinə görə, bu sözləri 32 ildən sonra qalıqları tapılan, bu gün Füzulidə dəfn olunan şəhid Sumbat Əliyevin qızı Şəmsiyyə Əliyeva deyib.
"Yaşımdan dolayı onu xatırlaya bilmirəm. Amma atamı anamın, bacımın, qohumlarımın danışdıqlarından yola çıxaraq təsəvvür etmişəm. Eşitdiklərim o olub ki, atam qəhrəman biriydi. Mən onunla fəxr edirəm".
Qeyd edək ki, şəhid Sumbat Əliyev Nüdrət oğlu 1992-ci il iyun ayında Qarabağ döyüşlərinə qatılıb. Döyüş yolu Füzuli rayon Qacar kəndində olub, artilleriyaçı kimi xidmət göstərib.
1993-cü il aprel ayının 2-də itkin düşüb, 32 il ondan heç bir xəbər alınmayıb.
2025-ci ilin 26 avqust tarixində Sumbat Əliyevin nəşinin qalıqları Xocavənd rayonunun Zoğalbulaq kəndində tapılıb.
Onun nəşinin qalıqları bu gün doğulduğu Aşağı Kürdmahmudlu kənd məzarlığında torpağa tapşırılıb.
