2025-ci ilin iyul ayının sonunda Azərbaycan bankları və “Azərpoçt” MMC sistemləri üzrə dövriyyədə olan ödəniş kartlarının sayı ötən aya nisbətən 271 min ədəd artaraq 20 milyon 913 min ədədə çatıb. Bu göstərici ötən ilin müvafiq dövrü ilə müqayisədə 14% artımı ifadə edir.
Bu barədə Finss.az Azərbaycan Mərkəzi Bankına (AMB) istinadən xəbər verir.
Hesabat dövründə debet kartlarının sayı 17% artaraq nağdsız ödənişlərin artımına töhfə verib, kredit kartlarının sayı isə 7% azalıb. Ödəniş kartlarının çoxalması nəticəsində ölkədaxili nağdsız əməliyyatların həcmi ötən ilin müvafiq dövrü ilə müqayisədə 20,2% artaraq 8,753 milyon manat təşkil edib.
Bu əməliyyatların 7,629 milyon manatı elektron ticarət vasitəsilə həyata keçirilib. Qalan məbləğin 1,120 milyon manatı POS-terminallar, 5 milyon manatı isə özünə xidmət terminalları və bankomatlar vasitəsilə icra olunub. İlin əvvəlindən ölkədaxili kart əməliyyatları üzrə nağdsız ödənişlərin həcmi ölkədaxili kart əməliyyatlarının 67,1%-ni təşkil edib.
Fuad Mədətov
Finss.az
