32 ildən sonra ilk dəfə Ağdama sürət qatarı yola düşəcək.
Sabah uzun illərin həsrətini çəkən ağdamlılar dəmir yolu ilə yenidən Ağdama yola çıxacaqlar.
Hurriyyet.Az bildirir ki, Modern.az-a açıqlamasında Milli Qəhrəman Allahverdi Bağırovun qızı Zümrüd Bağırova da Ağdama yola düşəcəklər arasında yer alacağını deyib.
Zümrüd xanım saytımıza bildirib ki, bu onlar üçün çox sevindirici və qürurverici bir hadisədir:
“İllər öncə, cəmi 5 yaşım olanda ailəmizlə birlikdə qatarla Ağdamdan Bakıya gəlmişik. O vaxt bu, mənim ilk səfər təcrübəm idi. İndi, illər sonra, yenidən o duyğuları yaşamaq mənim üçün çox dəyərlidir.
Ən əsası isə budur ki, Ağdama gediş-gəlişin bərpa olunması bütün xalqımız üçün böyük bir sevincdir”.
Həmsöhbətimiz həmçinin Ağdama köçlə bağlı müraciət etdiklərini də dilə gətirib:
“Biz artıq müraciət etmişik, hələ də məcburi köçkün statusumuz qalır. Qismət olsa, cənab Prezidentimizin dəstəyi ilə Ağdamda evlər inşa edildikdən sonra ümid edirik ki, iş yerlərimiz də uyğun şəkildə dəyişdirilər və ailəlikcə doğma yurdumuza – atamızın torpağına köçərək ailəliklə orada yaşayarıq”.
