"Psixoterapiya təkcə düşüncə və davranışa deyil, beyin quruluşuna da təsir göstərir..."
Dünya üzrə təxminən 280 milyon insan ağır depressiyadan əziyyət çəkir. Bu xəstəlik təkcə psixoloji vəziyyətə deyil, həm də beyindəki anatomik strukturlara təsir edir.
Moderator.az xəbər verir ki, bu barədə "science.mail.ru" nəşri yazıb.
Depressiya və beynin sirli mexanizmləri
Nəşr qeyd edir ki, ən çox dəyişikliklər hippokamp və amiqdalada (badamabənzər cism), yəni emosiyaların idarə olunmasına cavabdeh mərkəzlərdə baş verir. Uzun illər bu dəyişikliklərin əsasən dərman müalicəsi və ya elektrik stimulyasiyası ilə geri çevrilə biləcəyi düşünülüb. Lakin son araşdırmalar göstərib ki, psixoterapiya da beyində eyni dərəcədə təsirli dəyişikliklər yaradır.
Alman alimlərinin kəşfi
Münster Universiteti və Halle-Vittenberq Universitetinin alimləri 30 ağır depressiya xəstəsini müşahidə edib. Onlar xəstələrin beynini struktur maqnit-rezonans tomoqrafiyası (MRT) vasitəsilə həm terapiyadan əvvəl, həm də 20 seansdan sonra təhlil edib.
Nəticələr heyrət doğurub: 19 pasiyentdə depressiyanın əsas simptomları demək olar ki, yoxa çıxıb. Beyində sol amiqdala və sağ ön hippokamp sahələrində nəzərəçarpacaq dərəcədə boz maddənin həcmi artıb. Bu artım nə qədər çox olubsa, simptomların yüngülləşməsi də bir o qədər güclü müşahidə olunub.
Psixoterapiya dərman qədər güclüdür
Araşdırmanı aparan alim, Lüvdiq-Maksimilian Universitetinin professoru Ronni Redlix qeyd edir: "Koqnitiv-davranışçı terapiya (KDT) düşüncələri, emosiyaları və davranışları dəyişdirməklə yanaşı, beyində də funksional və struktur dəyişikliklər yaradır. Bu təsir əvvəllər yalnız dərmanlarla və ya elektrostimulyasiya ilə bağlı sübut olunub. İndi isə psixoterapiya üçün də ilk dəfə elmi əsas ortaya qoyulub".
Müalicənin fərdiliyi və yeni perspektivlər
Tədqiqat göstərir ki, psixoterapiya təkcə insanın psixoloji vəziyyətinə deyil, həm də beynin fiziki quruluşuna təsir edir. Bu, depressiyanın müalicəsində yeni bir yanaşmanı təsdiqləyir: bəzi pasiyentlər üçün dərman müalicəsi daha effektli ola bilər. Bəzilərində elektrostimulyasiya yaxşı nəticə verir. Digərləri üçün isə psixoterapiya ən uyğun seçimdir.
Alimlər hesab edir ki, psixoterapiya artıq "yumşaq üsul" yox, tam hüquqlu tibbi müalicə vasitəsi kimi qəbul edilməlidir. Bu nəticələr gələcəkdə depressiya ilə mübarizədə yeni qapılar aça bilər.
Depressiya yalnız ruh halı ilə bağlı problem deyil - o, insan beyninin quruluşuna toxunan ciddi bir xəstəlikdir. Və indi sübut olunub ki, psixoterapiya beyni dəyişdirə bilir. Bu kəşf, depressiyanın müalicəsində ümid qığılcımı olmaqla yanaşı, həm də milyonlarla insana dərmanlardan kənar alternativ yol göstərir.
