ABŞ prezidenti Donald Trampın administrasiyası Çin jurnalistlərinə qarşı yeni vizə məhdudiyyətləri tətbiq etməyi təklif edib.
"Unikal" xəbər verir ki, bu barədə “Bloomberg” agentliyi məlumat yayıb.
Yeni qaydalara görə, Çin jurnalistlərinin ABŞ-da qalma müddəti 90 günlə məhdudlaşdırılacaq, yalnız uzadılma imkanı nəzərdə tutulacaq. Digər ölkələrin jurnalistləri üçün isə bu müddət 240 gün olacaq. Bu dəyişiklik mövcud qaydanı ləğv edəcək – hazırda jurnalistlər ezamiyyətlərinin sonunadək ölkədə qala bilirlər.
Təklif ictimai müzakirə üçün 30 günlük dövrə çıxarılacaq.
Qeyd edək ki, ABŞ bundan əvvəl də Çin rəsmilərinə qarşı vizə məhdudiyyətləri tətbiq etmişdi. Aprel ayında verilən qərara əsasən, buna səbəb Çin hakimiyyətinin əcnəbilərin, o cümlədən diplomat və jurnalistlərin Tibetə girişinə mane olması göstərilmişdi.
Bundan öncə Avropa ölkələri də ABŞ-a səfər qaydalarını korrektə etməyə başlamışdılar. Finlandiya, Danimarka və Almaniya vətəndaşlara Trampın göstərişinə əsasən federal hökumətin yalnız iki cinsi – kişi və qadını tanıması qərarı ilə bağlı ABŞ-a səfərləri “ehtiyatla planlaşdırmağı” tövsiyə etmişdi.
