BBC News Azərbaycanca Xidmətinin hazırladığı xəbərləri, təhlilləri və videoları birbaşa WhatsApp Kanalımızda izləyin. Qoşulmaq üçün linkə klikləyin.
Birləşmiş Millətlər Təşkilatının 2025-ci ilin mart ayında dərc etdiyi Dünyanın Ən Xoşbəxt Ölkələri hesabatında Finlandiya ardıcıl olaraq səkkizinci dəfə birinci yerdə qərarlaşıb.
Finlandiyalılar "dünyanın ən xoşbəxt ölkəsi" adını daha çox laqeydlik və bir qədər də bezginliklə qarşılayıblar.
Lakin turizm sahəsində çalışanlar turistlərin Finlandiya ilə xoşbəxtlik arasında əlaqə qurmasından məmnundurlar və ölkəyə səfər edərək Finlandiya xoşbəxtliyini şəxsən yaşamalarını ümid edirlər.
Helsinki Hava Limanına çatanda və ya Baltik dənizi kruizindən Finlandiyanın limanlarından birinə enəndə sizi gülüş və şən zarafatlarla dolu bir səs-küylü atmosferin qarşılayacağını gözləməyin.
Həqiqət budur ki, finlər sadə həyat tərzini qəbul etmiş, ayaqlarını yerə basan insanlardır.
Onlar, ümumiyyətlə xoşbəxtdirlər və hətta BMT hesabatı ilə qürur duyurlar. Amma eyni zamanda hesab edirlər ki, "xoşbəxtlik" onların vəziyyətini tam ifadə edən düzgün söz deyil.
Bunun əvəzinə "məmnunluq", "hüzur" və ya "həyatdan razılıq" kimi sözləri üstün tuturlar.
Finlandiya Prezidenti Aleksandr Stubb-ın bir neçə gün əvvəl Facebook-da yazdığı kimi:
"Heç kim həmişə xoşbəxt ola bilməz. Bəzən şərait və vəziyyətlər xoşbəxt olmağı çətinləşdirir. Amma bunu bacarmağın ilk addımı təhlükəsizlik, azadlıq və bərabərlik kimi əsas hüquqlara sahib olmaqdır".
Finlandiyada xoşbəxtlik anlayışı həm də mədəni bir məna daşıyır və insanların gündəlik həyatı ilə sıx bağlıdır.
Finlər daim həzz dalınca qaçmaq əvəzinə, tarazlıq, bağlılıq və məmnuniyyət üzərində qurulmuş bir baxışa sahibdirlər və bir çox turistlər getdikcə bundan təsirlənirlər.
Turistlər üçün bu, sadəcə, müşahidə ediləcək bir şey deyil, həm də ölkənin təbiəti, yeməkləri, sauna mədəniyyəti, ətraf mühitə mənfi təsirləri azaldan dayanıqlı dizayn və həyat tərzi ilə birbaşa iştirak etməyə imkan verən bir təcrübədir.
Finlandiyanın turizm kampaniyası Visit Finland-ın beynəlxalq əməliyyatlar direktoru Teemu Aloha belə deyir:
"Fin xoşbəxtliyini bu beş ünsürün cəmi kimi görürük".
Təbiətlə bağ qurmaq
Bir çox turist üçün səfərlərinin başlanğıc və ya son nöqtəsi olan Helsinki bu məmnuniyyəti görmək üçün gözəl bir fürsət yaradır.
Sahilboyu yerləşən şəhər təbii bir yarımadadır və dəniz, çay yatağı və göl yatağından əldə edilən torpaqlar üzərində yayılıb.
Helsinkidə velosiped icarəyə götürmək və sahilboyu yollarla sürmək, yaxud şəhər mərkəzindən şimaldakı meşə zolağına doğru getmək asan və zövqlüdür.
Təbiətdə belə sərbəst ruhlu bir macəra xoşbəxtlik hormonu endorfinin artmasına səbəb olur və bu təcrübə, BMT-nin uzunömürlülük, azadlıq və müsbət duyğularla bağlı xoşbəxtlik meyarları ilə birbaşa əlaqəlidir.
Səbirli olmaq
Finlandiya iqtisadi təzyiqlərdən və münaqişələrdən azad deyil, uzun qışlar isə insanların psixi sağlamlığına mənfi təsir göstərə bilir.
Fincə "xoşbəxtlik" anlayışı, birbaşa tərcüməsi çətin olan, amma dözümlülük, tolerantlıq, cəsarət və iradənin birləşməsindən ibarət "sisu" sözünün də təsirini daşıyır.
Bu anlayış haqqında geniş yazılar yazan fin-kanadalı müəllif Katya Pantzar bunu belə izah edir:
"İnsanların və cəmiyyətlərin çətinliklər və sıxıntılar qarşısında təslim olmaq, bir-birini günahlandırmaq və ya hücum etmək əvəzinə birlikdə qalmasını təmin edən bir düşüncə tərzidir".
Katya Pantzar ona diqqət çəkir ki, dünyanın ən xoşbəxt ölkələri sıralamasında ilk dördlükdə Skandinaviya ölkələri yer alıb, o ölkələr ki, sosial rifahı dəstəkləmək üçün qurulmuş güclü sosial təminat sistemlərinə malikdilər.
"Xoşbəxtlik və rifah mədəni xüsusiyyətlərdir" – o deyir və əlavə edir:
"Finlandiyada hər kəs ən yaxın meşədən, parktan, sahildən və ya göldən orta hesabla 200 metr uzaqlıqda yaşayır. Buna görə də istər təbiət, istər saunalar, ictimai kitabxanalar, səmərəli və təhlükəsiz ictimai nəqliyyat, təmiz içməli su, təhsil və səhiyyə xidmətləri əlçatandır. Hər kəs üçün gündəlik xoşbəxtliyin çoxsaylı nümunələri mövcuddur."
Katya Pantzar, həmçinin gündəlik canlandırıcı fəaliyyət kimi isti saunadan sonra soyuq suya girməyi əhatə edən "kontrast terapiyası"nın gücləndirici təsirlərinə diqqət çəkir.
"Helsinkidə bunu etmək inanılmaz dərəcədə asandır, çünki şəhər dənizlə əhatə olunub" , – o deyir və əlavə edir:
"Suya atılmaq üçün uzaqlara getməyə və ya çox pul xərcləməyə ehtiyac olmadıqda, bunu hər gün etmək daha asan olur. İnsanlar bunu işdən əvvəl və ya sonra, hətta iş fasilələrində də edə bilirlər".
Bəzi finlər "dünyanın ən xoşbəxt ölkəsi" tituluna şübhə ilə yanaşsalar da, əksəriyyət eyni fikirdədir.
Təqaüdçü Juha Roha deyir:
"Finlandiyanın dünyanın ən xoşbəxt ölkəsi olduğunu düşünmək mənim üçün asan deyil. Tayland və Nepal kimi daha kasıb ölkələrdə, bütün çətinliklərə baxmayaraq, insanlar sakit və rahat görünürlər.
Finlandiyada bəzən başqa ölkələrdə insanların daha xoşbəxt olduğuna dair sözlər eşidə bilərsiniz. Amma biz öz daxilimizdə malik olduqlarımızla kifayətlənir və xoşbəxt oluruq".
