İsveçin “Saab” şirkəti pilotsuz uçuş aparatlarına qarşı (C-UAS) hazırladığı “Nimbrix” raketini təqdim edib.
“Poliqon” “Saab”a istinadən xəbər verir ki, yeni raket döyüş meydanında kiçik dronlardan gələn təhdidlərin qarşısını almaq üçün hazırlanıb.
“At və unut” prinsipinə əsaslanan bu raket “Saab” tərəfindən sürətlə inkişaf etdirilir. O, hədəf axtarıcı sistemə, yüksək zərbə gücünə malik döyüş başlığına, kiçik ölçüyə sahib olacaq və müştərilərə aşağı qiymətlə təklif ediləcək. Raketin fəaliyyət məsafəsi 5 kilometrə qədər olacaq və aktiv axtarıcı sistem vasitəsilə hədəfi izləyəcək. Onun döyüş başlığı hava partlayışı rejimində PUA sürülərinə qarşı effektiv şəkildə istifadə edilə biləcək.
“Yer-hava” tipli “Nimbrix” raketinin həm müstəqil şəkildə, həm də daha geniş hava hücumundan müdafiə sisteminin tərkibində işlədilməsi mümkündür. Müştəri tələblərinə uyğun olaraq çevik quraşdırma imkanları sayəsində “Nimbrix”, müxtəlif nəqliyyat vasitələrinə və ya sabit mövqelərə yerləşdirilə biləcək. Raketin qənaətcil qiyməti, kifayət qədər hava hücumundan müdafiə qatı yaratmaq üçün çoxsaylı bölmələrin istifadəsini mümkün edəcək.
“Saab”ın bildirdiyinə görə, hazırda raketin satışı ilə bağlı müştərilərlə danışıqlar davam edir və şirkət ilk tədarükləri 2026-cı ildə həyata keçirməyi planlaşdırır.
Qeyd olunub ki, “Nimbrix” 2025-ci il 9-12 sentyabr tarixlərində Londonda keçiriləcək DSEI sərgisində “Saab” stendində nümayiş etdiriləcək.
