BAKI, 30 avqust. TELEQRAF
Çimərliklərdə əsaslı tikililərə icazə verilmir.
Teleqraf xəbər verir ki, bu barədə jurnalistlərə açıqlamasında Dövlət Turizm Agentliyinin Qoruqları İdarəetmə Mərkəzinin İdarə Heyətinin sədri Murad Ağabəyli deyib.
Onun sözlərinə görə, Agentliyin Abşeronda apardığı monitorinqlər nəticəsində məlum olub ki, Şüvəlan qəsəbəsində yerləşən çimərliklərin ərazisində infrastruktur xaotik şəkildə – əsaslı, bəzən isə yarımçıq tikililər formasında qurulmuşdu:
“Bu isə həm ümumi mənzərəni korlayır, həm də turistlərin çimərliklərdən rahat istifadəsini çətinləşdirirdi. Sözügedən tikililər artıq sökülüb və onların yerində müasir standartlara uyğun çimərliklər salınıb. Çimərliklərdə artıq əsaslı tikililərə icazə verilmir.
Bu ərazidə ümumi avto-dayanacaq hissəsi, uşaq meydançası, uşaq əyləncə meydançası, futbol, voleybol meydançaları, sanitar qovşaqlar, soyunub geyinmə otaqları, duşlar, eyni zamanda ayaq yuma məntəqələri, çətirlər, şezlonglar, söhbətgahlar qurulub. Yerli və xarici turistlər bu infrastrukturdan ictimai əsaslarla, yəni ödənişsiz istifadə edə biləcəklər. Təbii ki, çimərliklərin dayanıqlığını qorumaq üçün müəyyən xidmətlər olacaq ki, sahibkalar həmin xidmətlərdən istifadə edərək gəlirlərini əldə edəcəklər. Bu xidmətlərə kiçik kofe və yaxud satış köşkləri aid olacaq. Onlar eyni zamanda çiməlliklərin baxımını və təmizliyini həyata keçirəcəklər”.
