ABŞ Dövlət Departamenti “Patriot” hava hücumundan müdafiə (HHM) sistemlərinin dəstəklənməsi və “Starlink”in alınması və saxlanması üçün Ukraynaya 300 milyon dollardan çox dəyəri olan avadanlıq satışını təsdiqləyib.
“Poliqon” xəbər verir ki, bu barədə Ukraynanın müdafiə naziri Denis Şmiqal özünün “Telegram” kanalında məlumat paylaşıb.
Məlumata görə, “Patriot” HHM sistemlərinin dəstəklənməsi üçün təsdiqlənən satışın dəyəri 179.1 milyon dollar təşkil edir.
““Patriot” hava hücumundan müdafiə sistemləri Ukrayna üçün həyati əhəmiyyət kəsb edir. Onlar xalqımızı, şəhərlərimizi və kritik infrastrukturumuzu Rusiyanın davamlı hava hücumlarından qoruyurlar”, – deyə paylaşımda bildirilib.
Həmçinin Ukraynaya satışı təsdiqlənən peyk rabitəsi xidmətləri və “Starlink” avadanlıqlarının dəyəri də təqribən 150 milyon dollardır.
