Almaniya kansleri Fridrix Merzin “Rusiya ilə qarşıdurma vəziyyətindəyik” açıqlaması müzakirələrə səbəb olub.
Bəs görəsən, onun bu açıqlaması nəyə hesablanıb?
Mövzu ilə bağlı KONKRET.az-a danışan siyasi şərhçi Cavanşir Abbaslı bildirib ki, Avropa ölkələrinin Rusiya ilə üz-üzə gəlməsi real görünmür.
Onun sözlərinə görə, Ukraynada gedən müharibə artıq Kreml üçün qələbə ilə nəticələnmək üzrədir:
“Rusiya Ukraynada apardığı işğalçı savaşı davam etdirir və artıq işğal etdiyi ərazilərin miqyasını genişləndirir. Bu, digər Avropa dövlətlərinin də müşahidə etdiyi bir reallıqdır. Belə olan halda onların Rusiyaya qarşı birbaşa savaşa girməsi inandırıcı deyil”.
Ekspert qeyd edib ki, Almaniyanın tarixən Rusiya ilə bağlı acı təcrübəsi mövcuddur:
“İkinci Dünya Müharibəsində Hitler Moskvaya hücum etsə də, Almaniya həmin savaşı uduzmuşdu. Bu səbəbdən alman cəmiyyətində ruslarla müharibə mövzusunda müəyyən xof qalmaqdadır. Ona görə də kanslerin dediklərinə ciddi əhəmiyyət vermək lazım deyil”.
Abbaslı əlavə edib ki, əgər Avropa dövlətləri həqiqətən Rusiya ilə müharibəyə hazır olsaydı, bunu üç il əvvəl , Ukraynaya geniş dəstək verməklə edərdilər:
“Ukraynaya yardımların verilməsində ən çox tərəddüd edən ölkələrdən biri məhz Almaniya idi. İndi isə belə açıqlamalar sadəcə Ukraynanı ümidləndirmək məqsədi daşıyır. Çox böyük ehtimalla bu müharibə Rusiya prezidenti Vladimir Putinin qələbəsi ilə nəticələnəcək. Bundan sonra isə heç bir Avropa ölkəsi yaxın on il ərzində Rusiya ilə müharibəyə girmək riskini daşımayacaq”.
