Sentyabr ayının 1-i “Cebhe.info” Xəbər Portalının yaranmasının, “Cümhuriyət” qəzetinin fəaliyyətinin bərpa olunmasının 10 ili tamam olur.
Bu münasibətlə də siyasət, iqtisadiyyat, sosial, mədəniyyət və digər sektorlardan olan dostlarımızdan təbriklər gəlməyə başlayır.
Müxtəlif sahələrdən olan ekspertlərin təbriklərini təqdim etməyə davam edirik:
“Cebhe.info”Xəbər Portalının və “Cümhuriyət” qəzetinin keçmiş redaktoru Elman Cəfərli:
“Bu gün Azərbaycanın xəbər məkanında özünəməxsus yeri və dəst-xətti olan “Cebhe.info” xəbər portalının fəaliyyətə başlamasından 10 il ötür. Eyni zamanda, müstəqil Azərbaycan mediasının ilk qaranquşlarından olan “Cümhuriyət” qəzetinin yenidən nəşrə başlamasından 10 il keçir. Tale elə gətirib ki, mən də hər iki hadisəyə şahidlik etmişəm. “Cebhe.info” Xəbər Portalına ilk xəbəri mən yerləşdirmişəm. Artıq 10 ildir bu sayt ayaqdadır, ön sıralardadır. El dili ilə desək, əlim yüngül olub.
2015-ci ilin sentyabrın 1-də fəaliyyətə başladıq. O vaxt mən başqa mətbuat orqanında çalışırdım. Bəs “Cebhe.info” Xəbər Portalına, “Cümhuriyət” qəzetinə məni çəkən nə oldu? İlk dəfə bu barədə hərəkatçı dostum Rəfail Becanovla danışdıq. Açığı, Rəfail Becanovu milli azadlıq hərəkatından, Bütöv Azərbaycan Birliyi (BAB) adlı təşkilatından, vətəndaş cəmiyyətindən, mediadan tanıyırdım. Öncələr rəhbərlik etdiyi başqa qəzetlə də əməkdaşlıq etmişdim. Bilirdim ki, peşəkarlarla işləməyi sevən, qəzetçiliyi bilən adamdır. Belə bir mühiti “Cebhe.info” Xəbər Portalında, “Cümhuriyət” qəzetində tapdım. Rəfail bəyin rəhbərliyi ilə qısa zamanda peşəkar, operativ bir komanda qura bildik.
“Cebhe.info” Xəbər Portalında və “Cümhuriyət” qəzetində keçən illəri jurnalist fəaliyyətimin ən parlaq dövrü adlandıra bilərəm. Redaktor kimi çalışdığım 6 il ərzində təcrübəli dostlardan çox şey öyrəndim, öz bildiklərimizdən də gənclərə verməyə çalışdım. 10 il öncə qurulan düzən, qoyulan dəst-xətt bu gün də davam edir.
“Cebhe.info” Xəbər Portalı, “Cümhuriyət” qəzeti bu gün də informasiya məkanında ön yerlərdədir, yenə də dünya azərbaycanlıların əsas tribunalarından biridir. “Cebhe.info” və “Cümhuriyət” qəzeti bu 10 ildə bir gün də Qarabağı, Güney Azərbaycanı, Borçalını, Kərkükü, xaricdə yaşayan soydaşlarımızı diqqətdən kənarda qoymayıb.
“Cebhe.info” və “Cümhuriyət” əsl jurnalistika məktəbidir. Bu məktəbin məzunları olan imza sahibləri bu gün ölkənin aparıcı KİV-lərində müxbir, redaktor işləyir, dövlət qurumlarına müxtəlif vəzifələrdə çalışırlar. Yubiley ilində başda əziz dostum Rəfail Becanov olmaqla “Cebhe.info” Xəbər Portalının və “Cümhuriyət” qəzetinin yükünü çəkən bütün zəhmətkeş əməkdaşlarına möhkəm cansağlığı, peşə fəaliyyətlərində uğurlar arzu edirəm. Güney Azərbaycanın qurtuluş xəbərini vermək də nəsibiniz olsun”.
Psixoloq Fərqanə Mehmanqızı:
“Cebhe.info” və “Cümhuriyət” - 10 il davam edən bir yol, 10 il dəyişməyən prinsipiallıq! Məlumat bolluğunda doğru sözü tapmaq hər zaman asan olmur. “Cebhe.info” isə 10 ildir ki, təkcə xəbər paylaşmır, insanlara düşünmək, analiz etmək və gerçəyi görmək imkanı verir. Bu, jurnalistikanın ən ali missiyasıdır. Mən bu illər ərzində dəfələrlə bu dəyərli platformanın qonağı olmuşam. Burada verdiyim hər müsahibədə hiss etmişəm ki, “Cebhe.info” və “Cümhuriyət” təkcə sual vermir, həm də dinləyir, anlayır, cəmiyyətin nəbzini tutur. Bu, müstəqil medianın peşəkarlığının göstəricisidir.
Psixoloq kimi bilirəm: insanın gücü prinsipiallığında, medianın gücü isə etibarlılığındadır. “Cebhe.info” 10 ildir ki, bu gücü qoruyur, oxucusuna vicdanla xidmət edir. Bu münasibətlə kollektivinizi ürəkdən təbrik edirəm! Yolu həmişə açıq, sözünüz həmişə azad, oxucunuz isə çox olsun! 10 yaşınız mübarək! Qarşıdakı illəriniz daha da parlaq və təsirli olsun!”.
Astroloq Səbuhi Rəhimli:
“10 ilin yarısından çoxunu, bəlkə də 7 ilini “Cebhe.info” saytında və onun qolları olan mətbu orqanlarında fəaliyyət göstərmişəm. İlk növbədə yaradıcı adama xoş gələn kollektivdir. Başda Rəfail bəy olmaqla, “Cebhe.info” və “Cümhuriyət” kollektivi mənim üçün doğmadır.
Çünki əsas rəhbərliyin qurduğu kollektivdir. Hər şey birbaşa rəhbərlikdən asılı olan işdir. Ona görə də mən də qürur duyuram. Bu gün öz “YouTube” kanalımdan kənarda əməkdaşlıq etdiyim yeganə media orqanıdır. Operativdirlər, çalışqan heyətləri var. Xəbər bazarında önəmli yeri olan saytdır. Düşünürəm ki, uğurlar davamlı olacaq”.
Psixoloq Əfsanə Rüstəmova:
“Hamının həyat yolunda adının ona mütləq təsiri var. Düşünürəm ki, “Cebhe.info” və “Cümhuriyət” adının da sizin həyatınıza təsiri var. Hər insan həyat yolunu bir şəkildə seçir. Ehtimal edirəm ki, sizlər də yanlış xəbərlə mübarizə aparmaq üçün bu adları seçmisiniz. Həmişə birlikdə yazı hazırlayanda doğru məlumatları ən düzgün və anlaşılan formada necə çatdıra bilərik. Niyəti bu olan xəbər portallarının olması oxucular üçün çox önəmlidir. Ona görə sizə təbrikdən əlavə, həm də təşəkkür edirik. Fokus olaraq cəmiyyəti öyrətmək və aydınlatmaq üçün bir yol olmağa çalışırsınız.
İnanıram ki, bu cəbhəniz sizi daha da möhməkləndirər. Mübarizənizdə bol şans və uğurlar arzulayıram. Kirli xəbərlərlə dolu bu böyük arenada doğru xəbər hazırlaya bilmək özü ən böyük mübarizədir. Əlbəttə ki, bu bir çox şeydən də imtina etmək deməkdir. Yeni yaşınız sizə bol uğur gətirsin”.
Ehtiyatda olan polkovnik, hərbi ekspert Üzeyir Cəfərov:
““Cebhe.info” Xəbər Portalının yaranmasının, “Cümhuriyət” qəzetinin fəaliyyətinin bərpa olunmasının 10 ilinin tamam olur. Bu münasibətlə kollektivi və bütün “Cebhe.info” və “Cümhuriyət” sevənləri təbrik edirəm. Bu 10 il ərzində Azərbaycan onlyan və yazılı mediası arasında saytınız və qəzetiniz kifayət qədər auditoriya toplamış bir saytdır.
Zaman-zaman mənim də açıqlamalarım, şərhlərim bu saytda və qəzetdə oxuculara çatdırılır. Xüsusilə “Cebhe.info” gün ərzində izlədiyim saytlardan biridir. Çünki orada da müəllif yazıları və digər maraqlı xəbər tapıram. Sayt dayanmadan inkişaf edir. Arzu edirəm 20, 30, 40 və sonrakı illərdə də davam etsin. Uğurlarınız bol olsun! Sonda Rəfail bəy başda olmaqla, bütün heyəti təbrik edirəm”.
Psixoloq İlhamə Mustafayeva:
“Əziz “Cebhe.info” saytının və “Cümhuriyət” qəzetinin bütün əməkdaşları! Sizi 10 illik yubileyiniz münasibətilə səmimi qəlbdən təbrik edirəm. Sizin sosial, iqtisadi, siyasi, mənəvi- psixolloji və s. sahələrdə yayımladığınız informasiyalar xalqımızın məlumatlanması və maariflənməsi yönümündə mühüm əhəmiyyətə malikdir. Mən xüsusi olaraq sizin saytın və qəzetin adını çox doğma və yaxın hiss edirəm.
Çünki Azərbaycan xalqı tarix boyu cəbhələrdə mübarizə aparan xalq olub, siz də arxa cəbhə olaraq böyük işlər görürsüz. Arzu edirəm ki, saytınız hər zaman xalqımızın uğurlarını və inkişafınıdan bəhs edən məlumatlarla zəngin olsun. Sizə çoxlu-çoxlu yubileylərinizi qeyd etməyi arzu edirəm və işlərinizdə uğurlar arzu edirəm!”.
İqtisadçı ekspert Akif Nəsirli:
“Hörmətli “Cebhe.info” və “Cümhuriyət” kollektivi! Sizi fəaliyyətinizin 10 illik yubileyi münasibətilə səmimi qəlbdən təbrik edirik! 10 il ərzində saytınız, habelə fəaliyyətini bərpa edən qəzetiniz cəmiyyətimiz üçün etibarlı informasiya mənbəyi, peşəkar jurnalistikanın nümunəsi və ictimai fikrin formalaşmasında önəmli tribuna kimi tanınıb.
Gündəm mövzularına çevik yanaşmanız, obyektiv və operativ xəbər təqdimatınız geniş oxucu auditoriyasının etimadını qazanıb. Arzu edirik ki, gələcək fəaliyyətinizdə də daim uğurlu olasınız, jurnalistikanın ali prinsiplərinə sadiq qalaraq daha böyük nailiyyətlərə imza atasınız. Uğurlarınız bol, oxucu sevginiz daim olsun!”.
“Azad İstehlakcılar” İctimayi Birliyinin sədri Eyyub Hüseynov:
“Cebhe.info” ən populyar, obyektiv, operativ informasiya aldığımız saytdır. Eyni sözləri “Cümhuriyət” qəzeti üçün də deyə bilərik. Hər ikisi hadisələrə çox tez reaksiya verir.
Xüsusən əhalinin gündəlik həyatı ilə bağlı olan məsələlərə, o cümlədən “Azad İstehlakcılar” İctimayi Birliyinin gördüyü işləri daim işıqlandırırlar. Həm “Cebhe.info”ya, həm də “Cümhuriyət”ə uzun bir fəaliyyət yolu arzulayıram. Əməkdaşlarınız kifayət qədər hazırlıqlı, bilikli və informasiyanı vaxtında verən peşəkardırlar. Hər birinə can sağlığı arzu edirəm”.
