"Qarabağ" növbəti dəfə ölkəmizi Çempionlar Liqasında təmsil edəcək.
Yarışın pley-off mərhələsinin cavab görüşündə "Ferentsvaroş"a məğlub olan (2:3) Ağdam klubu ilk görüşdəki qalibiyyət (3:1) sayəsində 8 ildən sonra yarışın əsas mərhələsində iştirak etmək hüququ qazanıb.
Bütün ölkə futbolsevərləri bu uğurun sevincini qeyd edir.
Hətta "köhlən atlar"ı təbrik etmək üçün onun rəqibləri də sıraya düzülüb.
"Zirə"dən uzaq Tovuzu təmsil edən "Turan"a kimi.
Amma "Neftçi" xaric. Bu komanda "Qarabağ"ı böyük uğur münasibəti ilə təbrik etməyib.
Və buna görə "ağ qaralar" ciddi tənqid edilib.
Buna görə "Neftçi"ni qınamaq doğrudurmu?
Əlbəttə, yox.
Ümumiyyətlə, heç bir rəqibin "Qarabağ"la bağlı təbrik postu yazmaq kimi məsuliyyəti yoxdur.
Yazılanlar da sadəcə bir jestdir və alqışalayiqdir. Deməli, "X" bir klubun, təşkilatın təbrik aksiyasından kənarda qalması hansısa qaydanın pozulması deyil.
Hələ-hələ "Neftçi"nin səssiz qalması isə həm də anlaşılandır.
Müstəqillik tarixində milli çempionatların hamısında iştirak edən iki komanda var - Biri "Qarabağ", digəri "Neftçi".
Bu klub "Qarabağ"ın əzəli rəqibidir.
Böyük tarixi, ənənəsi var.
Bu gün pis günlərini yaşaya, "Qarabağ"la duellərdə acı məğlubiyyətlər ala bilər, amma əzəli rəqib statusunu itirməyib.
Elə futbolda böyük rəqabətlər bu cür yanaşmalardan doğur.
Sadəcə bakılıların idman nəticələrinin uğursuz olması fonunda atdığı belə addımlar kimlərdəsə qıcıq yaradır.
Ümid edək ki, "ağ qaralar"ın meydandan kənar mübarizəsi yaxın zamanda yaşıl meydanlara da sirayət edəcək.
XANOĞLAN İMANOV
