Azərbaycanlı iş adamı Araz Mehdiyev Şeremetyevo aeroportunda ən böyük "duty free" mağazalarının operatoru olmaqdan çıxıb.
Ölkə.Az-ın RBK-yə istinadən məlumatına görə, avqustun 25-də “Travel Retail Şeremetyevo” MMC-yə nəzarət şirkətə son iki ildə rəhbərlik edən Vitali Bavinə keçib. 2022-ci ildə yaradılan bu şirkət aeroportdakı "duty free" və "duty paid" mağazalarının böyük hissəsini idarə edir. Buraya "Max Mara", "Hugo Boss", "Swarovski" və digər butiklər daxildir.
2024-cü ildə şirkət gəlirini ikiqat artıraraq 12,4 milyard rubl (154 milyon dollar) həcmində dövriyyə əldə edib.
Bundan əvvəl Mehdiyev Domodedovo hava limanında da şirkətlərə sahib olub və “İmperial Duty Free”də paylara malik idi. Lakin 2025-ci ilin yaz və yay aylarında bu aktivlər Marşall adalarında qeydiyyatdan keçmiş ofşor şirkətlərə keçib.
Biznesmen həmçinin ‘Kiyevskaya ploşad’ qrupu ilə əlaqələri ilə tanınırdı. O, 2018-ci ildə Qod Nisanov və Zarah İliyevə məxsus bir sıra şirkətlərdə pay əldə etmişdi. Həmin paylar əvvəllər iş adamı İlham Rəhimova aid olub. Lakin artıq 2019-cu ildə paylar yenidən Rəhimova qaytarılıb.
