İran Silahlı Qüvvələrinin Baş Qərargah rəisi general-mayor Əbdülrəhim Musəvi bölgədə xarici qüvvələrin mövcudluğunu region ölkələrinin əsas narahatlıq səbəbi adlandırıb.
Yeniavaz.com xəbər verir ki, “Mehr” agentliyinin məlumatına görə, general Musəvi bu fikirləri Tehranda Ermənistan Təhlükəsizlik Şurasının katibi Armen Qriqoryanla görüşdə səsləndirib.
Görüş zamanı iranlı general iki ölkə arasında tarixi və mədəni ortaq dəyərlərə diqqət çəkərək bildirib ki, Ermənistan və Azərbaycan arasında sülh sazişinin imzalanması regiona sabitlik gətirəcək. O, İranın bu cür təşəbbüsləri həmişə dəstəklədiyini vurğulayıb.
General Musəvinin sözlərinə görə, regiondan kənar güclərin, xüsusən də ABŞ-nin bölgədə iştirakı əsas gərginlik mənbəyidir.
Öz növbəsində, Ermənistan Təhlükəsizlik Şurasının katibi Armen Qriqoryan iki ölkə arasında münasibətlərin müsbət dinamika ilə inkişaf etdiyini qeyd edib. O, avqustun 8-də imzalanmış sazişlərin əhəmiyyətini vurğulayaraq, Ermənistanın Sünik marşrutu üzərində milli suverenliyini qoruyub saxlamağa çalışdığını, bunun da İran-Ermənistan əlaqələrinə mənfi təsirlərin qarşısını almağa xidmət etdiyini deyib.
