“Qarabağ” əsas mərhələdə nə edə bilər?

Avqustun 28-də keçirilən püşkatma mərasimində “Qarabağ”ın Çempionlar Liqasının əsas mərhələsindəki rəqibləri bəlli oldu. Ağdamlılar “Çelsi”, "Ayntraxt", "Ayaks" və "Kopenhagen" ilə evdə, "Liverpul", "Benfika" , "Napoli" və "Atletik"lə səfərdə qarşılaşacaq.

“Köhlən atlar”ın 8 rəqibindən beşi “böyük beşlik”, ikisi “ikinci eşelon” çempionatlarındandı. Rəqiblərin hamısı güclüdü - onsuz da bu turnirdə zəif rəqib yoxdu. Gəlin bütün rəqibləri gözucu təhlil edək, “Qarabağ”ın şanslarını dəyərləndirək.
“Çelsi” ilə yenə eyni turnirdə qarşılaşırıq. Güclüdümü? Çox güclüdü. Son KDÇ-nin qalibidi. Finalda bütün Avropaya qan udduran PSJ-ni ilk hissədəcə darmadağın etdi. Roman Abramoviçin gedişindən sonra klubun yeni strategiyası var. Komandada rəsmən qeydiyyatda olan futbolçuların sayı-hesabı yoxdu. 2017/18 mövsümü ilə müqayisə etsək, yəqin ki, o heyət daha güclüdü. Son 10 ilin ən güclü “Çelsi”si bəlkə də o mövsümdə idi. Açığı danışsaq, bu oyunda “Qarabağ”ın xal qazanması çox çətindi.

“Liverpul”la səfərdə oynamaq nə deməkdi? “Enfild” səfəri istənilən klub üçün ağırdı. Bu stadionda “Real”, “Barselona” diz çöküb. Arne Slotun rəhmi gəlsə, böyükhesablı məğlubiyyət almadan ayrılmaq olar. Hazırda komandada oyuna köklənmək problemi aşkar görünür. Liverpullular çempionatda ilk iki oyunda iki top öndə olduqları halda, hesabın bərabərləşməsinə imkan yaradıblar. Aleksander-Arnoldun gedişindən sonra cağ cinahda da ciddi problem var. Bu da Zubir üçün avantajdı. Fikrimcə, bu oyunda möcüzə də “Qarabağ”ın harayına çata bilməyəcək.

“Ayntraxt” isə 12 il əvvəl qarşılaşdığımız rəqibdi. 2013/14-də - “Qarabağ”ın qruplarda debüt mövsümündə Frankfurt təmsilçisi ilə qarşılaşmışdıq. Bakıda iki cavabsız qol buraxan Qurbanovun komandası səfərdə də eyni sayda qol buraxsa da, təsəlli qolunu vura bilmişdi. Ötən mövsüm bundesliqada çempion “Bavariya” ilə “Bayer-04”dən geri qalan “Ayntraxt” bu mövsümə də böyükhesablı qələbə ilə start verib. Çətin olsa da, xal almaq mümkün olan rəqibdi.

“Benfika” ilə səfər oyunu da çətin keçəcək. Portuqaliyanın üç nəhəngindən biri pley-offa iddialılardandı. “Ayaks”la duelin təəssüratı yenidi. Ötən ilin oktyabrında bu rəqibə evdə 0:3 uduzmuşuq. Ancaq hesab oyuna görə deyildi. Xal ala biləcəyimiz komanda kimi görməyə məhkumuq.
Daha bir rəqib “Napoli”di. Neapol təmsilçisi ötən mövsüm A seriyasının qalibi olub, bu mövsümün də favoritlərindəndi. Lukaku, De Bruyne kimi təcrübəlilər komandanın əsas silahıdı. “Qarabağ”ın bu rəqibdən xal alması möcüzə olardı.

“Kopenhagen” nə qədər çətin rəqib olsa da, yəqin ki, bu komandanı məğlub etməyin vacibliyini futbolçular hamıdan yaxşı anlayır. Turniri ən azı bir qələbə ilə yekunlaşdırmaq lazımdı. Bu qələbəni isə danimarkalılardan qoparmaq olar. “Qarabağ” 2017-də bu komandaya səfərdə 1:2 uduzub, evdə isə 1:0 hesabıyla qalib gəlib. Ümid edək ki, bu dəfə də Bakıda biz sevinəcəyik.

Sonuncu oyun Bilbaoda basklılara qarşı olacaq. Eyni meydanda 10 il əvvəl indi “Şamaxı”ya çevrilən “İnter” oynayıb və iki cavabsız qol buraxıb. Düzdü, Bakıdakı cavab görüşü 0:0 bitmişdi. Çox çətin oyunlardan biri olacaq. Azarkeşləri də stadionda gözəl atmosfer yaradır. Ümid edək ki, heç olmasa, bir xal qoparmaq mümkündü.

MÜZƏFFƏR QULUZADƏ

• Futbol
• Idman
• Qarabağ
• Rəqiblər
• Püşkatma