
ABŞ Prezidenti Donald Tramp bir neçə gün ictimaiyyətə görünmədikdən sonra onun öldüyünə dair sosial mediada yayılan əsassız iddialardan sonra şənbə günü qolf oynamağa gedərkən görüntülənib.
Yeniavaz.com “Newsweek”ə istinadən xəbər verir ki, Tramp nəvəsi Kay Trampla birlikdə Ağ Evin Cənub Qazonunda avtomobilə minərkən kameralara tuş gəlib. O, ağ polo köynək, qara şalvar və üzərində “MAGA” yazısı olan məşhur qırmızı papaq geyinib. Prezidentin korteji səhər saat 8:45-də Ağ Evdən çıxaraq Virciniyadakı qolf meydançasına yola düşüb.
Sosial şəbəkələrdə Trampın ölümü ilə bağlı yalan xəbərlər sürətlə yayılıb. X-in süni intellektlə işləyən chatbotu “Grok”un məlumatına görə, bu barədə paylaşımlar şənbə səhərinə qədər 1,3 milyondan çox baxış toplayıb. Həmin vaxt “#whereistrump” həştəqi ABŞ-də X platformasında altıncı ən populyar mövzu olub.
Cümə gecəsi Trampın rəsmi “Truth Social” hesabında yayılan açıqlamada prezidentin tarif siyasətini müdafiə edən mesaj dərc olunub. Mətnin şəxsən Tramp tərəfindən yazılıb-yazılmadığı məlum olmasa da, paylaşımda belə qeyd olunub: “Bütün tariflər hələ yerindədir! Əgər onlar ləğv edilərsə, bu, ABŞ üçün fəlakət olacaq və ölkəmizi maliyyə cəhətdən zəiflədəcək”.
