Kainatın elə bir nöqtəsi yoxdur ki, orada İlahi Rəhmət hiss olunmasın. Yeni doğulan körpələri düşünün. Ya da yeni doğulan heyvanları… Onlar da İlahi Rəhmətin əhatəsində deyillərmi?

***
Məsələn, bir balina üçün analıq vəzifəsinin ən çətin dəqiqəsi balasını dünyaya gətirdiyi dəqiqədir. Çünki balina balası boğulmasın deyə, doğular-doğulmaz onu suyun üzərinə çıxarmalıdır. Ona görə də, ana balina bir an da olsun gözlərini balasından ayırmamalıdır.

***
Kenquru balasını heyvanlar arasında bəlkə də ən xoşbəxt heyvan saymaq olar. Çünki o, 6 aydan 8 aya qədər anasının isti kisəsində yaşayır. Hətta, anası otladıqda başını kisədən çıxarıb onu müşayiət edir.

***
Ancaq heç də bütün heyvanlar kenquru balası kimi asan yem tapa bilmirlər. Məsələn, Şimal dənizində yaşayan bir quş balası hər gün özü ağırlığında balıq və xərçəng yeyir. Buna görə də, ana quşlar öz balalarını doyurmaq üçün bəzən kilometrlərlə yol qət etməli olurlar.

***
Şirlər öz balalarına göstərdikləri şəfqətlə hətta insanlara da nümunədirlər. Onlar nə qədər sərt görünsələr də, bir o qədər yumşaqdırlar. Şirlər bəzən başqa şirlərin balalarını da öz balalarından ayırmadan əmizdirirlər.

***
Bəbir balaları anaları ilə yaşadıqları 15-20 ay ərzində yaşamaq üçün lazım olan hər şeyi öyrənirlər. Qəribədir ki, bütün bunlara baxmayaraq, bəbirlərin (elə şirlərin də) balalarının ancaq yarısı sağ qalır.

***
Qorillalar balalarını elə insanlar kimi daşıyırlar. Bala qorillalar bir az böyüdükdən sonra analarının kürəyinə çıxaraq orada səyahət etməyi xoşlayırlar. Ata-analar isə vaxtlarının çox hissəsini balalarını yedizdirmək və tüklərini təmizləməklə keçirirlər.

***
Ana maralın yeni doğulmuş balasını qurutmaq üçün göstərdiyi fədakarlığa həqiqətən tamaşa etməyə dəyər. 15-20 kiloqramlıq bala maralın ana maraldan ayrılmamaq üçün göstərdiyi canfəşanlığa isə baxmaqla doymaq olmur.

***
Heyvanlar arasında bir fədakarlıq nümunəsi də qurbağalardır. Məsələn, bəzi qurbağalar balalarını mədələrində çıxarırlar. Bunun üçün ana qurbağalar döllənmiş yumurtaları udurlar. Balaları çıxana qədər isə (bu, təqribən 6-7 həftə çəkir) heç bir şey yemirlər.

***
Elə heyvanlar da var ki, balalarını yedirmək üçün uzun müddət yuvalarından çıxmırlar. Məsələn, ağ ayı balasına süd vermək üçün düz 3 ay yuvasında qalır...
Yəqin ki, düşünməyə dəyər...

Murad Məmmədov