İndoneziya prezidenti Prabovo Subianto ölkədəki kütləvi iğtişaşlar səbəbindən Çinə səfərini təxirə salıb.
Bu barədə avqustun 30-da prezidentin ofisinə istinadən “Al Arabiya” telekanalı məlumat yayıb.
Qərarın ölkədəki “daxili vəziyyət” nəzərə alınaraq verildiyi bildirilir.
Çində Subianto İkinci Dünya Müharibəsinin başa çatmasının 80-ci ildönümü ilə bağlı keçiriləcək şənliklərdə iştirak etməli idi.
Məlumata görə, ölkədə nümayişlər həmkarlar ittifaqı nümayəndələrinin deputatların imtiyazlarına və yüksək maaşlarına etirazları ilə başlayıb. Daha sonra nümayişlərdən birində zirehli polis maşınının təkərləri altında öldürülən motosiklet taksi sürücüsünün ölümü iğtişaşların artmasına səbəb olub.
Bildirilir ki, 3 əyalətdə etirazçılar hökumət binalarını yandırıb. Təhlükəsizlik qüvvələri isə iştirakçılara qarşı təzyiqli su və gözyaşardıcı qazdan istifadə edir.
(Müsavat)
