Prezident İlham Əliyev Ağdaş rayon icra hakimiyyətinin başçısı Orxan Hüseynzadəyə töhmət verib. Mediada yayılan xəbərlərə görə, Orxan Hüseynzadə həmin vəzifəyə təyin olunduqdan sonra Ağdaş icra hakimiyyətində özü ilə gətirdiyi kadrlara geniş “səlahiyyətlər” verib, nəticədə dövlətin rəsmi ierarxiya və subardinasiya qaydaları pozulub. Prezidentin sərəncamı, əlbəttə, digər dövlət qurumlarına və vəzifəli şəxslərə də xəbərdarlıq səciyyəsi daşıyır və belə halların yolverilməz olduğunu bir daha yada salır. Odur ki, bu sərəncamdan sonra medianın, o cümlədən sosial şəbəkələrin gündəminə yenidən Azərbaycan Dövlət Su Ehtiyyatları Agentliyi gəlib.
Bu da səbəbsiz deyil. Zaur Mikayılov ADSEA-nın rəhbəri təyin olunduqdan sonra mediada belə xəbərlər yayılmışdı ki, o, öz qohum-qudalarını qurumda rəhbər vəzifələrə təyin edib və bu strukturda rəsmi vəzifə səlahiyyətləri deyil, “patriarxal qanunlar” işləyir.Konkret olaraq deyilirdi ki, Agentliyin sədri Zaur Mikayılovun qurumun Aparat rəhbəri vəzifəsinə Fuad Quliyev təyin edilib. 2021-ci ildən Azərbaycan Meliorasiya və Su Təsərrüfatı Açıq Səhmdar Cəmiyyətində sədrin müşaviri vəzifəsində çalışan Fuad Quliyevin Dövlət Su Ehtiyatları Agentliyinin sədri Zaur Mikayılovun qudasıdır. Eyni zamanda, qeyd olunurdu ki, Zaur Mikayılov daha bir qudasını da özünə müşavir təyin edib. Bu müşavirin Şirinov Əsəd Əli oğlu olduğu deyilirdi.
Bu məlumatlar geniş ictimai rezonans doğurdu və ADSEA məsələni ört-basdır etməyə çalışdı. Daha doğrusu, həmin şəxslərin adları qurumun rəsmi saytından silindi və mətbuata belə bir məlumat ötürüldü ki, Zaur Mikayılovun özünə müşavir təyin etdiyi qudası Əsəd Şirinov artıq vəzifəsindən istefa verib. Agentlik sədrinin müşaviri vəzifəsindən Aparat rəhbəri vəzifəsinə təyin etdiyi digər bir qudası Fuad Quliyevin də təyinatı müvəqqəti olaraq dayandırılıb. Artıq ləğv edilən Azərbaycan Meliorasiya və Su Təsərrüfatı Açıq Səhmdar Cəmiyyətinin saytından da sözügedən vəzifəli şəxslərin adları silinib. Məsələ ilə bağlı Meliorasiya və Su Təsərrüfatı ASC-nin Mətbuat xidmətindən cavab almaq mümkün olmamışdı.
Mənbə: https://qafqazinfo.az/news/detail/zaur-mikayilov-vezife-verdiyi-qudalarini-isden-cixarib-439116
