BAKI, 31 avqust. TELEQRAF
ABŞ Milli Kəşfiyyatının direktoru Tulsi Qabbard ilə Mərkəzi Kəşfiyyat İdarəsinin (MKİ) rəhbəri Con Ratkliff arasında münasibətlər MKİ-nin məxfi zabitinin adının açıqlanmasından sonra pisləşib.
Teleqraf xəbər verir ki, bu barədə "NBC News" mənbələrə istinadən məlumat yayıb.
Qabbard daha əvvəl X-də təhlükəsizlik icazələrindən məhrum edilmiş ABŞ kəşfiyyatının hazırkı və keçmiş 37 rəsmisinin siyahısını dərc etmişdi. Onlar “kəşfiyyat məlumatlarından siyasi məqsədlər üçün istifadə və manipulyasiya etməklə onu icazəsiz sızdırmaqda” itiham olunublar. ABŞ mətbuatının yazdığına görə, siyahıda Rusiya üzrə ixtisaslaşmış yüksək rütbəli MKİ zabiti də var.
"NBC News"un mənbələri bildirir ki, kəşfiyyat rəhbərinin bu addımı CIA rəsmilərini heyrətə salıb.
Qeyd olunur ki, Qabbard ABŞ Prezidenti Donald Trampın siyasi düşmənlərini, o cümlədən MKİ agentlərini necə ifşa etdiyini göstərməklə etimad qazanmağa çalışır.
