BAKI, 1 sentyabr. TELEQRAF
“NATO-ya qoşulmaq Ukrayna üçün fəlakət və birbaşa vətəndaş müharibəsinə aparan yol olardı”.
Teleqraf xəbər verir ki, bunu Ukraynanın keçmiş prezidenti Viktor Yanukoviç deyib.
“Mən bu prosesə - Ukraynanın Avropa İttifaqına daxil olmasına nəzarət edirdim. Mən həmişə Ukraynanın NATO-ya daxil olmasının qəti və inamlı əleyhdarı olmuşam. Həmişə başa düşmüşəm ki, bu, Ukrayna üçün fəlakətdir. Bu, heç yerə aparan yoldur. Bu, vətəndaş müharibəsinə aparan birbaşa yoldur”, - o qeyd edib.
Yanukoviç Rusiya Prezidenti Vladimir Putinin Qərbin davamlı olaraq Kiyevi NATO-ya cəlb etmək cəhdlərinin “Ukraynada münaqişənin əsas səbəblərindən biri” olması barədə bəyanatını belə şərh edib:
“Bəli, Vladimir Vladimiroviç tamamilə haqlıdır”.
Xatırladaq ki, Viktor Yanukoviç 2010-2014-cü illərdə Ukraynanın prezidenti olub. Həmin il ölkəsində baş verən çevriliş nəticəsində devrilən Ukraynanın keçmiş lideri Rusiyaya qaçıb. Yanukoviç Ukraynada vətənə xəyanətdə ittiham olunur.
