Olaylar.az xəbər verir ki, bu barədə okeanoloq Robert Ballard CNN-ə müsahibəsində danışıb.
Ballard 1 sentyabr 1985-ci ildə "Titanik"in qalıqlarını aşkar etmişdi. O etiraf edib ki, əvvəlcə gəminin axtarışları üçün maliyyə tapa bilməyib. Lakin onun dərin suda vizuallaşdırma sistemləri ABŞ Hərbi Dəniz Qüvvələrinin marağına səbəb olub və beləliklə, ekspedisiya gizli əməliyyat üçün örtük rolunu oynayıb.
Alimin sözlərinə görə, o, hərbi dəstək əldə edə bilib, çünki "Titanik"lə yanaşı, okeanda batmış "Thresher" və "Scorpion" adlı sualtı qayıqlar barədə də məlumat toplayacaqlarını vəd edib. "Çoxları bilmirdi ki, 'Titanik'in axtarışları əslində mənim də iştirak etdiyim supergizli hərbi əməliyyatın örtüyü idi", - deyə Ballard bildirib.
O qeyd edib ki, "Scorpion" qalıqlarının öyrənilməsi ona "Titanik"in dəqiq yerini müəyyənləşdirməkdə kömək edib. Alim izah edib ki, iri gəmilər batanda qalıqlar zəncirvari şəkildə yayılır: ağır detallar tezliklə dərinliyə çökür, yüngül hissələr isə daha gec batır.
