Sumqayıt Şəhər Məhkəməsində özgənin xeyli miqdarda əmlakını oğurlamaqda təqsirləndirilən Sakit Məmmədovun (adı, soyadı şərtidir) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Fərid Nəsimiyevin sədrliyi ilə keçirilən prosesdə hökm oxunub.
Məhkəmənin hökmü ilə təqsirləndirilən şəxs Cinayət Məcəlləsinin 177.2.1-ci (oğurluq), 177.2.3 və 177.2.4-cü maddələri ilə təqsirli bilnib və o, 2 il müddətinə azadlıqdan məhrum edilib.
İttiham aktına əsasən, Sakit Məmmədov tanışı ilə əvvəlcədən əlbir olaraq bir qrup şəxs halında mənzildən oğurluq edib. Belə ki, o, 2024-cü il iyulun 15-də zərərçəkmiş Gülarə Səmədovanın (adı, soyadı şərtidir) yaşadığı Sumqayıt şəhəri, 47-ci məhəllədə yerləşən mənzilinə qanunsuz daxil olaraq ümumilikdə 25 min 555 manat dəyərində pul və qızıl-zinət əşyalarını talayıb. Hadisə nəticəsində zərərçəkmiş şəxsin əmlakına xeyli miqdarda ziyan vurulub.
Hadisədən sonra Sakit Məmmədov saxlanılaraq cinayət məsuliyyətinə cəlb edilib.
Məhkəmə istintaqı zamanı Sakit Məmmədov özünü təqsirli bildiyini, əməlindən peşman olduğunu, dəymiş ziyanı ödədiyini və zərərçəkmişin ona qarşı heç bir şikayətinin olmadığını söyləyib.
Qeyd: Zərərçəkmiş Gülarə Səmədova xəstəxanaların birində həkim işləyir.
Kamal Məmmədov
