Yeni araşdırmalara görə, gündəlik intensiv fiziki fəaliyyət, o cümlədən ev işləri zamanı edilən hərəkətlər ölüm riskini altı ilə qədər azalda bilər və ömrü uzadır.
Hafta.az-ın yazdığına görə. “Circulation” elmi jurnalında dərc olunan araşdırma fiziki fəaliyyətin gündəlik həyatda faydalarını ölçən ilk tədqiqatlardan biridir.
Sidney Universitetindən Emmanuel Stamatakisin rəhbərlik etdiyi tədqiqatçılar, gündəlik tapşırıqlar zamanı bir neçə qısa səyin, xüsusən də ürək xəstəliyindən vaxtından əvvəl ölüm riskini əhəmiyyətli dərəcədə azaltdığını aşkar etdilər.
Ümumdünya Səhiyyə Təşkilatının (ÜST) hesablamalarına görə, hər il dünyada təxminən 18 milyon insan ürək-damar xəstəliklərindən dünyasını dəyişir.
Həkimlər sağlam həyat üçün ən azı 150 dəqiqəlik orta intensivlikli aerobik hərəkətləri, məsələn, sürətli gəzintiləri və ya qaçış, yaxud da üzgüçülük kimi 75 dəqiqəlik intensiv idmanı həftədə ən azı iki gün güc məşqləri ilə birləşdirməyi tövsiyə edir.
Bununla belə, yeni araşdırma müəyyən edib ki, hətta təsadüfi fiziki fəaliyyət kimi tanınan orta intensivlikli, nizamsız məşq sadəcə üç dəqiqə belə insanın ürək xəstəliyi və ölüm riskini azalda bilər. Tədqiqatçılar biləkdə taxılan akselerometrlərdən istifadə edərək yeddi gün ərzində təxminən 24 min iştirakçıdan toplanan sağlamlıq məlumatlarını təhlil ediblər. İştirakçıların orta yaşı 62 olub və onlar müntəzəm şəkildə idman etmədiklərini bildiriblər.
Alimlər iştirakçıların müxtəlif intensivliklərdə (güclü, orta və yüngül) təsadüfi fiziki fəaliyyətini ölçüblər. Onlar aşkar ediblər ki, gündə cəmi 5 dəqiqə güclü aktivlik və təxminən 25 dəqiqə orta intensivlikli fəaliyyət xüsusilə ürək xəstəliyindən ölüm riskini azalda bilər.
Alimlər “Ürək-damar riskində əhəmiyyətli azalma gündə təxminən 14 dəqiqəyə qədər güclü intensivlikli fəaliyyət və ya 35-50 dəqiqə orta intensivlikli fəaliyyət üçün müşahidə edildi” deyiblər.
Alimlər qeyd ediblər ki, təsadüfi fiziki fəaliyyətin təşviqi insanları idmanı gündəlik işlərinə daxil etməyə təşviq edə bilər.
