Dünyanın ən nüfuzlu iqtisadi jurnalı Forbes-un 2025-ci ilin milyarderlər siyahısında Azərbaycan mənşəli dörd iş adamının adı yer alıb. Bu, ölkəmizin beynəlxalq iqtisadi arenadakı mövqeyinin gücləndiyinin göstəricisidir.
Bakuinfo xəbər verir ki, Vaqif Ələkbərov 1950-ci ildə Bakıda anadan olub. Mühəndis ixtisasına malik olan Ələkbərov neft sektorunda fəaliyyət göstərir və Lukoil neft şirkətinin təsisçisi, uzun müddət isə rəhbəri olub. Onun sərvəti 28.7 milyard dollar olaraq qiymətləndirilir və o, Forbes-un 2025-ci il milyarderlər siyahısında 62-ci yerdə qərarlaşıb. Hal-hazırda Rusiya vətəndaşıdır və uzun illərdir beynəlxalq biznes dairələrində tanınır.
God Nisanov isə Azərbaycan əsilli iş adamı olaraq əsasən Moskva bazarında geniş ticarət mərkəzləri və daşınmaz əmlak layihələri ilə məşğuldur. Onun sərvəti 4.2 milyard dollar civarındadır və Forbes siyahısında 1072-ci yerdədir. Nisanov 2000-ci illərin ortalarından bəri dünyanın ən zəngin iş adamları siyahısında yer alır.
Zərax İliyev isə Qırmızı Qəsəbə doğumludur və uzun illərdir God Nisanov ilə birlikdə fəaliyyət göstərir. Daşınmaz əmlak sektorunda uğurlar qazanmışdır və “Food City” layihəsi kimi iri ticarət mərkəzlərinin sahibidir. Forbes-un siyahısında o da Nisanov ilə birlikdə 1072-ci sırada yer alır və sərvəti 4.2 milyard dollar səviyyəsində qiymətləndirilir.
Fərhad Əhmədov isə sənaye və energetika sektorunda fəaliyyət göstərən Azərbaycan əsilli iş adamıdır. Onun sərvəti 1.6 milyard dollar olaraq qiymətləndirilir və Forbes-un 2025-ci il milyarderlər siyahısında 2110-cu yerdə qərarlaşıb. Əhmədov qaz və enerji sektorunda böyük biznes sahiblərindən biridir və sərvətini əsasən sənaye investisiyalarından qazanıb.
Bu şəxslərin dünya milyarderlər siyahısında yer alması Azərbaycan mənşəli iş adamlarının qlobal iqtisadiyyatda artan rolunu göstərir. Onların uğurları ölkəmizin beynəlxalq nüfuzunu artırmaqla yanaşı, gənc biznesmenlər üçün də nümunə təşkil edir.
