ABŞ Dövlət katibi Marko Rubio Meksika səfərini başa vurduqdan sonra son dayanacağı olan Ekvadorda kartellərlə mübarizəni müzakirə etmək üçün prezident Daniel Noboa ilə görüşüb.
Paytaxt Kitoda Karondlet Sarayında Rubionu qəbul edən Noboa, Los Lobos və Los Choneros adlı mütəşəkkil cinayətkar dəstələri terrorçu təşkilatlar elan etdiyinə görə ABŞ-a təşəkkür edib.
Ekvador mediasının məlumatına görə, Noboa və Rubio mütəşəkkil cinayətkarlıq və narkotik qaçaqmalçılığı ilə mübarizə, miqrasiya və iki ölkə arasındakı ticarət əlaqələrini müzakirə ediblər.
Rubio Noboa ilə görüşdən sonra keçirdiyi mətbuat konfransında ABŞ-ın ortaq düşmən olan narkotik kartelləri ilə mübarizədə Ekvador hökumətinə dəstəyini bir daha vurğuladığını bildirib.
ABŞ-ın Los Lobos və Los Choneros mütəşəkkil cinayətkar dəstələrini terrorçu təşkilatlar elan etdiyini xatırladan Rubio deyib: “Biz Ekvador hökumətini narkotik terrorizmi ilə mübarizəsində dəstəkləmək niyyətindəyik. Narkotik qaçaqmalçılığına qarşı mübarizə üçün 13,5 milyon dollar və pilotsuz uçuş aparatlarının alınması üçün 6 milyon dollar ayırırıq.”
Rubio əlavə edib ki, Ekvador hökuməti cinayətkar dəstələrlə indiyə qədər heç olmadığı qədər amansız mübarizə aparır və ABŞ bu sahədə hər cür dəstək verməyə hazırdır.
O həmçinin bildirib ki, ABŞ Ekvador ilə ticarət əlaqələrini genişləndirmək istəyir.
Rubio narkotiklərlə mübarizəyə diqqət çəkərək deyib: “Bu qruplar insanları terrora məruz qoyur və Meksika, Kolumbiya, eləcə də Venesuela kartelləri ilə əlaqələri sayəsində təsirlərini gücləndiriblər. Biz bu qruplarla mübarizə aparmaqda qətiyyətliyik, çünki bu məsələ bizi də təsir edir. Siz qaçaqmalçılığın zorakılığından əziyyət çəkirsiniz, amma ölkəmizdə də bu narkotiklərin istifadəsi səbəbindən minlərlə insan həyatını itirib.”
