"Ailələrə Sosial Dəstək” İctimai Birliyinin sədri, əməkdar müəllim Esmira Rəhimova QHT.az-a açıqlamasında bildirib ki, müasir dövrdə xeyriyyəçilik həm fərdlərin fəaliyyətində, həm də dövlət siyasətində mühüm prinsipə çevrilib.
Onun sözlərinə görə, bu sahədə zəngin təcrübəyə malik QHT-lərin birləşərək konseptual yanaşma sərgiləməsi vətəndaş cəmiyyətinin inkişafına mühüm töhfə verə bilər. Esmira Rəhimova vurğulayıb ki, statistik göstəricilər və sosioloji sorğular əsasında xeyriyyəçilik hərəkatının gələcək inkişafı proqnozlaşdırılmalıdır:
“Bunun üçün böyük təcrübəsi olan QHT-lərin peşəkar mütəxəssisləri birgə sosial layihələr həyata keçirməlidir. Bu, vətəndaş cəmiyyətinin inkişafına ciddi təkan verəcək. Xüsusilə də iqtisadi böhranların yaşandığı dövrdə xeyriyyəçiliyin yeni formaları, iştirakçıları və mexanizmləri meydana çıxır: “Peşəkar QHT-lər bu istiqamətdə fəaliyyət göstərərək həm ölkəmizdə, həm də dünyada xeyriyyəçilik hərəkatının inkişafına töhfə verir.”
Esmira Rəhimova əlavə edib: “İnsanları sevmək həmişə asan deyil. Bunu peşəkarlıqla edən insanlar var – bunlar xeyriyyəçilərdir.”
Pərvanə Fərhadqızı
