Əli Əliyev istefa verdi

Futbol üzrə Qazaxıstan milli komandasının baş məşqçisi Əli Əliyev Belçika yığmasına biabırçı məğlubiyyətdən sonra istefa verdiyini açıqlayıb.

Arena.az xəbər verir ki, baş məşqçi bu qərarını dünya çempionatının (DÇ-2026) Avropa zonası üzrə seçmə mərhələsində Belçika millisinə 0:6 hesablı məğlubiyyətdən dərhal sonra bəyan edib.

O, böyük hesabla məğlub olduqları matçdan sonra keçirilən mətbuat konfransında bunları söyləyib:

“Baş verən hər şey, məğlubiyyət mənim günahımdır. Buna görə bütün məsuliyyəti öz üzərimə götürürəm. İstefa ərizəmi yazacağam və prezidentə məlumat verəcəyəm”, – baş məşqçi bildirib.

Xatırladaq ki, Qazaxıstan millisi DÇ-2026-nın seçmə mərhələsində Belçikaya 0:6 hesabı ilə uduzub. Milli daha əvvəl Uels (1:3, 0:1) və Şimali Makedoniyaya (0:1) da məğlub olub. Komanda yeganə qələbəsini Lixtenşteynlə görüşdə qazanıb – 2:0. Yer aldığı J qrupunda 3 xalla 4-cü sırada qərarlaşmış qazaxların növbəti sınağı oktyabrın 10-da evdə Lixtenşteynə qarşı olacaq.

Əli Əliyev bu ilin aprel ayında Qazaxıstan millisinin baş məşqçisi təyin edilmişdi. O, bu komandanı cəmi 4 oyuna çıxarıb, 1 qələbə, 3 məğlubiyyət görüb. Əliyev daha öncə ölkəsinin milli komandasını müvəqqəti baş məşqçi kimi də 2 oyuna çıxarıb. 44 yaşlı mütəxəssis buna qədər “Qızıljar”, “Jenis”, “Astana-Jas”, “Şaxtyor” (Karaqanda) kimi klublarda da baş məşqçi kimi çalışıb.